د وزارت د کارمندانو او چارواکو سره د مخابراتو او معلوماتي ټکنالوجۍ وزارت د سرپرست تعارفي غونډې

د مخابراتو او معلوماتي ټکنالوجۍ سرپرست وزیر ښاغلي الحاج نجیب الله حقاني د وزارت د بیلابیلو برخو له کارمندانو او چارواکو سره جلا جلا وکتل

پدې غونډو کې، چې د وزارت د پالیسۍ او پروګرام مرستیال ښاغلي احمد مسعود لطیف رای هم پکې برخه درلوده د مخابراتو سرپرست وزیر لومړی د افغانستان اسلامي امارت د پالیسۍ، موخو او مهمو پروګرامونو، د مخکینی حکومت ضعفونو او ناکامیو او ځینو ناغوښتل شوي او ویجاړونکي جریانونو په اړه خبرې وکړې او تفصیلي معلومات یې وړاندې کړل.

ښاغلي الحاج حقاني ډاډ ورکړ چې د وزارت مشرتابه د وزارت د کارکوونکو او تخنیکي کادرونو ملاتړ کوي او د هغوی له تجربو څخه به مخابراتي سکتور د ودې او د خدمتونو د وړاندې کولو په برخو کې کار اخلي او همداراز ژمنه یې وکړه چې د کارمندانو معاشونو ورکولو په ګډون د ځینو نورو ستونزو حل کولو کې به همکاري وکړي.

په پای کې، د دې وزارت کارمندانو د مخابراتو وزارت د مشرتابه صداقت او هراړخیز ملاتړ هرکلی وکړ او ژمنه یې وکړه چې دوی به خپلو کارونو ته دوام ورکړي او د اړوندو چارو او دندو په پرمخ وړلو کې به په ډیر صداقت کار وکړي.