د معلوماتو د امنیت او سایبري جرایمو د یرغلونو د مخنیوي په برخو کې ۵۸۰ تنو دولتي کارکوونکو لپاره د زده کړې پروګرام

د مخابراتو او معلوماتي ټکنالوجۍ وزارت مشرتابه په یوه خبري ناسته کې چې د کانټیننټال په هوټل جوړه شوې وه،  څرګنده کړه چې دغه وزارت 580 د دولتي ادارو کارکوونکو ته د برښنایي حکومتولۍ، سایبري جرایمو په وړاندې د مبارزې او معلوماتو د امنیت په برخو کې د زده کړو لنډ مهال پروګرام جوړ کړی دی.

د مخابراتو او معلوماتي ټکنالوجۍ وزارت تخنیکي مرستیال چې په یاده غونډه کې ګډون کړی وو خبرې وکړې او وویل: چې په یادو برخو کې د زده کړو اسانتیاوو برابریدل یوه لویه لاسته راوړنه ده او په هیواد کې د برښنایي حکومتولۍ پر لور عملي ګام دی. هغه زیاته کړه: چې د برښنایي حکومتولۍ په لور حرکت د مخابراتو او معلوماتي ټکنالوجۍ وزارت د ستراتیژیکو موخو څخه دی او تر اوسمهاله په دې لاره کې ډیرې هڅې شوي دي. او مخابراتو وزارت لخوا هیوادوالو او دولتي کارکوونکو ته د ټکنالوجیکي وړتیاوو د لوړولو لپاره پروګرامونه جوړې شوي دي.

ښاغلي حسام یادونه وکړه چې د معلوماتي ټکنالوجۍ او برښنایي حکومتولۍ په برخو کې د زده کړې پروګرامونه د برښنایي حکومتولۍ د پلي کیدو لپاره لومړني ګامونه دي، هغه وویل: چې د زده کړې دغه پروګرام د دولتي کارکوونکو په تیره بیا د معلوماتي ټکنالوجۍ په برخه دولتي ادارو لپاره د لومړني بنسټ په توګه تر لاس لاندې نیول شوی دی.

ښاغلي حسام څرګنده کړه: چې هغه کارکوونکي چې په دغو پروګرامونو کې زده کړه کوي د برښنایي حکومتولۍ او د سایبري ګواښونو او یرغلونو په وړاندې د مبارزې لپاره ښه مهارتونه ترلاسه کوي.

د برښنایي حکومتولۍ د سرچینو د برخې آمر ښاغلي رضوان الله مسکین د یاد پروګرام مهمې برخې په لاندې ډول معرفي کړل:

• د افغانستان د اسلامي دولت په ټولو اداري برخو کې د برښنایي حکومتولۍ د لاښه، مډرن او موثرو خدمتونو وړاندې کول.
• په ټولو وزارتونو او دولتي ادارو کې د برښنایي حکومتولۍ د پراختیا لپاره لارښوونه.
• د ارزونې او څارنې په برخه کې مسلکي او تخنیکې لارښوونې.
• د سایبري جرایمو د مخنیوي څرنګوالی.

همداراز هغه زیاته کړه چې د سایبري جرایمو د مخنیوی لپاره یو لابراتوار هم جوړ شوی دی.

په دغه ناسته کې د HUAWEI او INTERNET WORK PATH شرکتونو رئیسانو په وار سره د موضو په اړوند خبرې وکړلې.

باید وویل شي، چې په افغانستان کې د برښنایي حکومتولۍ او د سایبري ګواښونو د خوندیتوب په باره کې دغه د زده کړې لومړنی پروګرام دی چې په لاره اچول کیږي.

په دغه پروګرام کې ۱۸۰ تنو د دولت لوړ پوړو چارواکو او ۴۰۰ تنو د مرکز او ولایتونو په ګډون د دولت نورو کارکوونکو ته زده کړه کیږي.

دغه پروګرام د مخابراتو او معلوماتي ټکنالوۍ وزارت د پروګرامونو څخه دی چې د USAID لخوا تمویلیږي او د HUAWEI  او INTERNET WORK PATH شرکتونو لخوا پرمخ بیول کیږي. د دغه پروګرام لګښت په ټولیزه توګه  ۵۸۰۰۰۰ ډالر دی او باید ووایل شی  چی دغه پروگرام نورو مراحل هم لری.