د مخابراتو او معلوماتي تکنالوژۍ وزارت د سایبري جرمونو څیړنیز لابرتوار جوړولو د پروژې هوکړه لیک لاسلیک کړ

د مخابراتو او معلوماتي تکنالوژۍ وزارت د خپلو کړنو او لاسته راوړنو په لړۍ کې د سایبري جرمونو څېړنیز لابراتوار د جوړولو هوکړه لیک د I Net Links له هندي شرکت سره لاسلیک کړ. د دې لابراتوار د جوړیدو هوکړه لیک د 139256 امریکایي ډالرو په ارزښت د مخابراتو او معلوماتي تکنالوژۍ وزارت د بریښنايي حکومتولۍ د سرچینو مرکز (EGRC-II) په مالي مرسته له یاد شرکت سره د ۱۳۹۵ کال د زمري میاشتې په (۲۰) شلمه نیټه لاسلیک شو. د بریښنايي حکومتولۍ د سرچینو مرکز (EGRC-II) د امریکا د متحده ایالتونو د نړیوالي پراختیا اداري (USAID) له لورې تمویلیږي چې د مخابراتو او معلوماتي تکنالوژۍ وزارت د بريښنايي حکومتولۍ ریاست په چوکاټ کې خپل فعالیت ترسره کوي.

د یادولو وړ ده چې یاده پروژه د معلوماتي سیسټمونو او اطلاعاتو د خوندیتابه ریاست (ISSD) په چوکاټ کې پلي کیږي چې موخه یې د دغه ریاست د کارونو لاښه والی او تنظیم دی.

د سایبري جرمونو څړنیزلابراتوار (Forensic lab) له جوړولو وروسته به د مخابراتو او معلوماتي ټکنالوژۍ وزارت او په ځانګړي توګه د معلوماتي سیسټمونو او اطلاعاتو د خوندیتابه ریاست (ISSD) په دې وتوانیږي چې د هیواد په کچه د سایبري جرمونو څیړنه او د سایبر متهمینو د تشخیص او پيژندنې په برخه کې کامیاب فعالیتونه ترسره کړي او په هیواد کې د سایبري جرمونو ګراف راښکته کړي.