په تیره لسیزه کې افغانستان د مخابراتو او معلوماتي ټکنالوجۍ په برخه کې د پام وړ وده او پرمختګ کړی دی
د افغانستان د اسلامي جمهوري دولت د مخابراتو او معلوماتي تکنالوجۍ وزیر ښاغلي امیرزي سنګین د مخابراتو او معلوماتي ټکنالوجۍ او نندارتون په لومړني نړیوال کنفرانس کې چې په کابل کې جوړ شوی و؛ وینا وکړه او ویې ویل: افغانستان په تیره یوه لسیزه کې د مخابراتو او معلوماتي ټکنالوجۍ په سکتور کې د پام وړ پرمختګ کړی، او لومړنی نړیوال مخابراتي او معلوماتي ټکنالوجۍ او نندارتون یې چې په کابل کې جوړ شوی و با ارزښته وباله.
یاد کنفرانس او نندارتون د روان ۱۳۹۲ کال د تلې میاشتې له ۲-۴ نیټې پورې په کابل کی په لاره اچول شوی و.
ښاغلي امیرزي سنګین په افغانستان کې د نړیوال کنفرانس د جوړیدو په هکله وویل: تیر کال د مخابراتو او معلوماتي ټکنالوجۍ وزارت د افغانستان اسلامي دولت وزیرانو شورا ته، په هیواد کې د نړیوال مخابراتی او معلوماتي ټکنالوجۍ د کنفرانس د جوړیدو طرح وړاندې کړه چې د تصویب وروسته د جمهوری ریاست عالي مقام د حکم پر بنسټ د کنفرانس په جوړولو وګمارل شو، د کنفرانس جوړولو لپاره یوه کمیټه چې د یو شمیر وزارتخونو او امنیتي ارګانونو څخه منځته راغلې وه هم ددغه کنفرانس د ښه جوړېدو په موخه تعیین شوه.
د مخابراتو او معلوماتي ټکنالوجۍ وزیر ښاغلي امیرزي سنګین وویل د کنفرانس موخې په افغنستان کې معلوماتي ټکنالوجۍ او مخابراتي پرمختګونو ښودل، د تجربو شریکول، سیمه ایزې همکارۍ او د معلوماتي ټکنالوجۍ پر اهمیت رڼا اچول و چې په دې هکله یې لاندې څو ټکي په ګوته کړل:
.jpg)
- د اړوندو لورو تر منځ د سیمه ایزې همکارۍ د تقویې له لارې د اقتصادی ودې لپاره د مخابراتو او معلوماتی ټکنالوجۍ د عامولو چټکتیا او د سیمه ایزو اړیکو د پراختیا لپاره د افغانستان د نقش پیاوړتیا.
- د سیمې د هیوادونو تر منځ د مخابراتو او معلوماتي ټکنالوجۍ او خدمتونو د وړاندې کولو لپاره د پوهې او غوره تجربو ګډون.
- د ټولنیزې او اقتصادي پراختیا او په سیمه کې د ملګرو ملتونو د زریزې موخو د تر لاسه کولو لپاره د مخابراتو او معلوماتي ټکنالوجۍ له ځواک څخه د موثرې ګټې اخیستنې په موخه د کارنده پالیسیو او چوکاټونو له لارې د رغنده چاپیریال برابرول.
- د مخابراتو او معلوماتي ټکنالوجۍ سکتور په پراختیا کې د افغانستان دلاسته راوړنو او ځواکمنتیا ښکارندوینه.
همدا راز ښاغلي سنګین د معلوماتي ټکنالوجۍ د اهمیت په اړه وویل: چې د معلوماتي ټکنالوجۍ د پرمختګ سره نړی په یوه معلوماتي ټولنه بدله شوی ده چې د هیوادونو د ټولنیزو اړیکو پر پراختیا، سیاسي بدلونونو او اقتصادي ودې باندې یې ژوره اغیزه کړې ده.
د مخابراتو وزیر ښاغلي امیرزي سنګین په افغانستان کې د مخابراتو او معلوماتي ټکنالوجۍ د پرمختګ په اړه څرګنده کړه:
د مخابراتو او معلوماتي ټکنالوجۍ وزارت د دولت د پالیسیو، قانوني چوکاټ او روښانه میکانیزم پر بنسټ عمل کړی او مهمې لاسته راوړنې یې تر لاسه کړې دي.
ښاغلي سنګین زیاته کړه: چې اوسمهال د هیواد ۹۰ سلنه ساحې د مخابراتي خدمتونو تر پوښښ لاندې راوستل شوې، شل میلیونه وګړي عملا د مبایل ټلیفون څخه ګټه اخلي، د انټرنټ د یو ام بی قیمت په ۹۷ دالرو پلورل کیږي چې د پام وړ کموالی ښیی، د لاښه او چټک انترنیټي خدمتونو وړاندې کولو په موخه د 3G جواز صادر شوی، د نوري فایبر حلقوي رنګ کار د بشپړیدو په حال کې دی او تر راتلونکي کال پورې به د هیواد ۸۰ سلنه وګړي د انټرنټ خدمتونو ته لاسرسی پیدا کړي.
ښاغلي سنګین زیاته کړه: چې د الکټرونیکي پیژندپاڼو تخنیکي سیستم جوړول او ډیزاین، د تلویزیوني شبکو اړول له انالوګ څخه ډیجیټل ته په هیواد کې د نوې ټکنالوجۍ څخه ګټه اخیستنه د ترقۍ پر لور یوبل ستر ګام دی. ښاغلی وزیر ټینګار وکړ چې پر دې هیڅکله بسنه نه کوو. د ټکنالوجۍ څخه ګټه اخیستنه او د هغه کارول دولتي او شخصي چاروکي پراختیا ومومي او آن تر دې چې راتلونکې ټاکنې باید د معلوماتي ټکنالوجۍ څخه په ګټه اخیستنه تر سره شي.
د یادونې وړ ده چې یاد کنفرانس او نندارتون د مخابراتو او معلوماتی ټکنالوجۍ وزارت په نوښت جوړ شوی و.
