لوګر ولايت کې د مخابراتو او معلوماتي ټکنالوجۍ رياست ښوونيز مرکز پرانيستل شو
د مخابراتو او معلوماتي ټکنالوجۍ وزارت د محترم مقام د لارښوونې له مخې په لوګر ولایت کې د کمپیوټر زده کړې مرکز په رسمي ډول پرانیستل شو.
په هغو مراسمو کې چې د دغه ښوونیز مرکز د پرانستلو په مناسبت جوړ شوي وو، د لوګر د مخابراتو او معلوماتي ټکنالوجۍ رئیس محترم مولوي مطیع الله عابد په تیرو دریو کلونو کې د دغه ریاست د لاسته راوړنو په اړه مفصل معلومات ورکړل.
نوموړي يادونه وکړه، چې د دغه ښوونيز مرکز په تجهيز او عصري کولو څه باندې دوه ميليونه افغانۍ لګښت راغلى، ۳۰ لپ ټاپ کمپیوټرونه د نویو تجهیزاتو سره پیرودل شوي او د روزنې مرکز هم ترمیم شوی دی.
دغه راز د لوګر ولایت د مقام مرستیال محترم الحاج مولوي محمدنور دین پرور په خپلو خبرو کې د لوګر ولایت د مخابراتو او معلوماتي ټکنالوجۍ د ریاست له هلو ځلو خوښي څرګنده کړه او ویې ویل: اسلامي امارت هڅه کوي چې له شته ننګونو سره سره د محدودو امکاناتو په کارولو سره خپلو هېوادوالو ته غوره خدمتونه وړاندې کړي.
ورپسې د مخابراتو او معلوماتي ټکنالوجۍ وزارت د داخلي پلټنې لوی رییس محترم مولوي محمد طارق فاروقي د دغو روزنیزو مرکزونو پر اړتیا او ارزښت هر اړخیزې خبرې وکړې او د مخابراتو او معلوماتي ټکنالوجۍ وزارت د محترم وزیر صاحب پیغام یې حاضرینو ته ولوست.
د یادونې وړ ده چې د لوګر ولایت ولسونو او د غونډې ګډونوالو د مخابراتو او معلوماتي ټکنالوجۍ وزارت د دغه نیک اقدام قدرداني وکړه او خوښي یې څرګنده کړه.
