د Content Management System پيژندنه
سهشنبه ۱۳۹۸/۱/۲۰ - ۱۴:۲۶
د مخابراتو او معلوماتي ټکنالوجۍ وزارت د یو خبري کنفرانس په ترڅ کې د محتویاتو مدیریت سیستم معرفي کړ.
د یاد سیستم پر بنسټ به د دولتي ادارو ټول ویب سايټونه د يو مرکز څخه مدیریت کيږي چې په پایله کې د معلوماتو رسونه اسانه کيږي.
په کنفرانس کې د مخابراتو او معلوماتي ټکنالوجۍ وزارت مالی او اداري مرستیال ښاغلي ډاکټر هادي هدایتي په خپلو خبرو کې وویل چې ددغه سیمستم د رامنځته کيدو څخه زموږ موخه د مخابراتي ټکنالوجۍ د و سایلو له لارې د ملت او دولت ترمنځ د اړیکو د تامینولو په اساس هېواد په معلوماتي ټولنه بدلول دي.
هغه زیاته کړه په دې موخه مو Content Management System رامنځته کړی چې د پرمختللي معلوماتي ټکنالوجۍ څخه په ګټه اخېستنه دولتي ادارې و کولی شي خپل سايټونه په اسانه او چټکه توګه مدیريت کړي او ددې لارې شته لاسته راوړنې، فعالیتونه او پلانونه له خلکو سره شریک کړي.
د دولتی بنسټونو په ټولنیزو پاڼو کې د مطالبو ښودل او نښلول، د معلوماتو خوندیتوب، د ویب سایټونو د پراخیتیا وړتیا، د مخکینې تخنیکي پوهې پرته د ویب سایټونو زده کړه او مدیریت، د سیستم د مدیریت لارښود او د دریو ( پښتو، دري، انګلیسي) ژبو درلودل ددغه سیستم له ځانګړنو څخه دي.
د یادونې وړ چې تر دا مهاله د ۲۵ بیلابیلو دولتي ادارو ویب سايټونه ددغه سیستم له لارې جوړ او مدیریت کیږی او په پام کې ده چې د روان کال تر پايه د هېواد ټولې دولتي ادارې ددغه سیستم له لارې مدیریت شي.
