د پکتیکا ولایت په اورګون ولسوالۍ کې د سلام مخابراتي شبکې یو نوی سایټ فعال او ګټې اخیستنې ته وسپارل شو
د مخابراتو او معلوماتي ټکنالوجۍ وزارت د پلان له مخې د پکتیکا ولایت اورګون ولسوالۍ درې سیمه کې د مخابراتي ستونزو د حل په موخه د سلام مخابراتي شبکې یو نوی سایټ د ټي ډي اف د لسمې پروژې په مرسته جوړ او د مخابراتي چوپړ د وړاندې کؤلو په موخه ګټې اخیستنې ته وسپارل شو.
د یاد مخابراتي سایټ په فعالېدو سره به د پکتیکا ولایت د اورګون ولسوالۍ درې سیمی اوسیدونکي له مخابراتي خدمتونو برخمن شي او کولای شي له انټرنټي او مکالماتي چوپړ ګټه پورته کړي.
د یادولو وړ ده پکتیکا ولایت د اورګون ولسوالۍ اوسېدونکو د مخابراتو او معلوماتي ټکنالوجۍ وزارت له مشرتابه مننه وکړه چې د هېواد لرو پرتو سیمو ته یې ځانګړې پاملرنه کړې او هغه سیمې چې له ډېره وخته د مخابراتي خدمتونو څخه بې برخې وې اوس مهال ورته غوره مخابراتي چوپړ وړاندې کېږي.
