د پنجشیر ولایت مقام د رهبرۍ او د مخابراتو او معلوماتي ټکنالوجۍ ریاست تر منځ ګډه ناسته ترسره شوه
د پنجشیر ولایت مقام د رهبرۍ او د مخابراتو او معلوماتي ټکنالوجۍ ریاست په ګډه غونډه کې په دغه ولایت کې د مخابراتي او انټرنیټي خدمتونو د پوښښ د پراختیا او پیاوړتیا په اړه خبرې وشوې.
په یاده غونډه کې د مخابراتي خدمتونو د پوښښ پر پراختیا او د کمزورو مخابراتي او انټرنیټي سیګنالونو پر پیاوړتیا ټینګار وشو او همداراز د مخابراتو او معلوماتي ټکنالوجۍ وزارت د اترا ادارې د نوې کړنلارې له مخې د سیم کارتونو د بیا ثبت پر بهیر هم خبرې وشوې او د دغې پروسې د لا ښه پرمخ بیولو لپاره د ګرځنده ټیم جوړېدل یې ښه ګام وباله.
د یادونې وړ ده چې په نږدې راتلونکي کې به په پنجشیر ولایت کې د سلام مخابراتي شبکې څلور سایټونه په فعالیت پیل وکړي.
