د پنجشیر ولایت د مخابراتو او معلوماتي ټکنالوجۍ ریاست او مخابراتي شرکتونو ترمنځ د همغږۍ غونډه وشوه
د چارو د لا ښه ترسره کولو په موخه د پنجشیر ولایت د مخابراتو او معلوماتي ټکنالوجۍ ریاست، آترا ادارې او مخابراتي شرکتونو ترمنځ د همغږۍ غونډه جوړه شوه.
په دې غونډه کې د مخابراتي شرکتونو له استازو سره د دولتي ادارو د مسئولینو او د یاد ولایت د اوسیدونکو شکایتونه او وړاندیزونه مطرح شول او ټینګار وشو چې مخابراتي شرکتونه باید خپل ټول فعالیتونه د قانون او د مخابراتو او معلوماتي ټکنالوجۍ وزارت د آټرا ادارې کړنلارې سره سم ترسره کړي، د خپلو پیرودونکو سره ښه او انساني چلند وکړي او په جدي توګه د ټاکل شوي نرخ څخه په لوړه بیه د سیم کارتونو پلور او د اجباري کریډټ زیاتوالي مخه ونیسي.
په یاده ناسته کې سپارښتنه وشوه، چې په هغو سیمو کې چې د مخابراتي شرکتونو خدمات کمزوري او اوسېدونکي یې له مخابراتي ستونزو سره مخ دي، د ستونزو د حل لپاره دې ژر تر ژره اقدام وشي.
د یادونې وړ ده چې د مخابراتي شرکتونو استازو د مخابراتو ریاست او اترا ادارې له دوامدارې همکارۍ مننه وکړه او ډاډ یې څرګند کړ چې ټولې کړنې به د اصولو او طرزالعمل سره سم ترسره کوي.
