د مخابراتو او معلوماتي ټکنالوجۍ وزارت وزیر د ام سي سي چینايي شرکت له عمومي رئیس او مل پلاوي سره لیدنه وکړه
د مخابراتو او معلوماتي ټکنالوجۍ وزارت وزیر ښاغلي الحاج مولوي نجیب الله حیات حقاني د ام سي سي چینايي شرکت له عمومي رئیس ښاغلي وانګ جي چینګ او مل پلاوي سره د مخابراتي خدمتونو، ټکنالوجۍ او همدا راز د مصنوعي ځیرکتیا اړوند خبرې وکړې.
دغې ناسته کې د مخابراتو او معلوماتي ټکنالوجۍ وزارت د ام سي سي چینايي شرکت عمومي رئیس ته د ښه راغلاست تر څنګ هېواد کې د ټکنالوجۍ په برخه کې په شته فرصتونو معلومات وړاندې کړل او همداراز یادونه یې وکړه چې د مخابراتو او معلوماتي ټکنالوجۍ وزارت هڅه کوي هېواد کې د ټکنالوجۍ د ودې او پرمختګ په برخه کې د سیمې او ګاونډیو هېوادونو سره په همکارۍ خپل پرمختګ چټک کړي.
ښاغلي وزیر صاحب زیاته کړه چې اوس وخت کې د نړۍ په هره برخه کې د ټکنالوجۍ د پرمختګ له مخې د مصنوعي ځیرکتیا وده چټکه شوې او د سالمې استفادې په صورت کې د چارو د آسانتیاو لپاره ترې په لوړه کچه ګټه اخیستل کېږي.
ورته مهال د ام سي سي چینايي شرکت عمومي رئیس ښاغلي وانګ جي مننه وکړه او همدا راز یادونه یې وکړه چې اوس مهال یاد شرکت د لوګر ولایت محمدآغې ولسوالۍ مس عینک سیمه کې د نړۍ د سترې پروژې د مسو د کان قرارداد له ځانه سره لري او هیله یې وښوده چې یاده سیمه کې غوره مخابراتي چوپړ په موخه ورته آسانتیاوې برابرې شي نوموړي همدا راز یادونه وکړه چې د یاد کان د چارو د ښه مدیریت لپاره یې افغان کادرونه د ټکنالوجۍ په برخه کې چین هېواد ته استولي چې د مصنوعي ځیرکتیا د زده کړې سربیره به ورسره د کان کیندنې د چارو مدیریت او پرمختګ هم چټک شي.
په پای کې ښاغلي وزیر صاحب د لوګر ولایت محمدآغې ولسوالۍ د مس عینک سیمه کې د یاد شرکت د مخابراتي ستونزو د حل په موخه ډاډ ورکړ او همداراز یادونه یې وکړه چې هېواد کې د افغان کادرونو د ظرفیت د لوړونې په موخه او په ځانګړي ډول اوس مهال له مصنوعي ځیرکتیا څخه د استفادې په دور کې د ظرفیت جوړونې او آسانتیاو د راوستو په موخه پوره هلې ځلې کوي.
