د مخابراتو او معلوماتي ټکنالوجۍ وزارت وزیر د ازبکستان هېواد له یو شمېر پانګوالو سره یې لیدنه وکړه
د مخابراتو او معلوماتي ټکنالوجۍ وزارت وزیر ښاغلي الحاج مولوي نجیب الله حیات حقاني د ازبکستان هېواد له یو شمېر پانګه والو سره چې افغانستان کې یې د سیمکارټونو واردولو او د تولید په برخه کې د پانګونې په برخه کې خبرې وکړې.
دغې ناسته کې له ازبکستان هېواد څخه راغلو پانګه والو افغانستان کې د سیمکارټونو په واردولو او همدا راز هېواد دننه د سیمکارټونو د یوې کارخونې د جوړولو غوښتنه وکړه.
د مخابراتو او معلوماتي ټکنالوجۍ وزارت وزیر ښاغلي الحاج مولوي نجیب الله حیات حقاني راغلو سوداګرو ته وویل چې د مخابراتو او معلوماتي ټکنالوجۍ وزارت د قوانینو په مراعاتولو سره پانګه والو سره هر راز همکارۍ ته چمتو دی، د ښاغلي وزیر صاحب په وینا چې سیمکارټ افغانستان کې دوه اړخه لري یو اړخ یې هغه دی چې پانګه وال له اړونده برخو جواز تر لاسه کړي او همدا راز په دویمه برخه کې دوی باید مخابراتي شرکتونو سره په مستقیم ډول یوه تفاهم ته ورسېږي ځکه اوسمهال افغانستان کې هر مخابراتي شرکت د خپلو سیمکارټونو د واردولو مسؤلیت لري.
ښاغلي وزیر صاحب دغې ناسته کې راغلو سوداګرو ته وویل چې د قانوني مراحلو له سر ته رسولو وروسته دوی کولای شي افغانستان کې د سیمکارټونو د تولید جواز ولري او دا یې د هېواد لپاره مهمه وګڼله خو تاکید یې وکړ چې د سیمکارټونو د تولید په برخه کې باید نړیوال معیارونه په پوره معنی په پام کې ونیول شي .
پای کې د مخابراتو او معلوماتي ټکنالوجۍ وزارت وزیر ښاغلي مولوي نجیب الله حیات حقاني افغانستان کې د سیمکارټونو د تولید په موخه د مخابراتو او معلوماتي ټکنالوجۍ وزارت د اټرا ادارې د تحلیل او رقابت ریاست وارسي کوونکي ښاغلي قاضي صبغت الله حامد او د مخابراتي خدمتونو د نظارت او کنټرول رئیس ښاغلي صبغت الله اندړ په مشرۍ یوه ګډه کمېټه وټاکله او دنده یې ورته وسپارله چې یاده موضوع له ازبکستاني پانګه والو سره تعقیب کړي او وروستی ګزارش یې له مقام سره شریک کړي.
