دپرمختللو موبایل براډ بانډ خدمتونو وړاندې کولو په موخو د فریکونسیو مزایدې د پایلو اعلان
د مخابراتو او معلوماتي تکنالوجۍ وزارت او د مخابراتي خدمتونو د نظیم اداره (اترا) ویاړي، چې د ګرځنده مخابراتي خدمتونو وړاندې کوونکو شرکتونو ته یې په هیواد کې دفریکونسیو د ویش مزایده (بولۍ)ترسره کړه.
دغه مزایده د ۲۰۲۴ کال د مارچ میاشتې په ۱۷ نیټه(چې دروان ۱۴۴۵ هـ ق کال درمضان المبارک میاشتې له ۷ او د۱۴۰۲هـ ش کال د کب میاشتې له ۲۷ سره سمون لري) ترسره شوه، چې پایلې یې په لاندې ډول دي:
دفریکونسي ۱۸۰۰ میګاهرتز بانډ
- اتصالات مخابراتي شرکت د ۲۰۰۵۰۰۰۰ (شل میلیونه او پینځوس زره) امریکایي ډالرو په بدل کې په ۱۸۰۰ میګاهرتز بانډ کې د ۵ میګاهرتز فریکونسي ګټونکی شو.
- روشن مخابراتي شرکت د ۱۹۰۰۱۴۰۰ (نولس میلیونه او څوارلس سوه) امریکایي ډالرو په بدل کې په ۱۸۰۰ میګاهرتز بانډ کې د ۵ میګاهرتز فریکونسي ګټونکی شو.
دفریکونسي ۲۱۰۰ میګاهرتز بانډ
- ام ټی ان مخابراتي شرکت د ۳۲۰۰۰۸۸۸ (دوه دیرش میلیونه او اته سوه اته اتیا) امریکایي ډالرو په بدل کې په ۲۱۰۰ میګاهرتز بانډ کې ۱۰ میګاهرتز فریکونسي ګټونکی شو.
دفریکونسي ۲۶۰۰ میګاهرتز بانډ
- داتصالات مخابراتي شرکت د ۱۳۶۰۰۰۰۰ (دیارلس میلیونه او شپږ سوه زره) امریکایي ډالرو په بدل کې په ۲۶۰۰ میګاهرتز بانډ کې ۱۰ میګاهرتز فریکونسي ګټونکی شو.
- دافغان بیسیم مخابراتي شرکت د ۱۳۴۰۰۲۲۶ (دیارلس میلیونه، څلورسوه زره او دوه سوه شپږویشت) امریکایي ډالرو په بدل کې په ۲۶۰۰ میګاهرتز بانډ کې د ۱۰ میګاهرتز فریکونسي ګټونکی شو.
د پورتنیو پایلو په اساس د اتصالات مخابراتي شرکت ۱۵ میګاهرتز فریکونسي ، د ام ټی ان مخابراتي شرکت ۱۰ میګاهرتز فریکونسي، د افغان بیسیم مخابراتي شرکت د ۱۰ میګاهرتز فریکونسي او روشن مخابراتي شرکت د پنځه میګاهرتز فریکونسیو ګټونکي شول، چې د پنځوس میګاهرتز واړندې شوې فریکونسي څخه څلویښت میګاهرتز فریکونسي د ۹۸۰۵۲۵۱۴ (اته نوي میلیونه، دوه پنځوس زره، پنځه سوه او څوارلس) امریکایي ډالرو په ارزښت د یادو شرکتونو لخوا و ګټل شوه.
دفریکونسي د مزایدې موخه په هیواد کې د مخابراتي خدمتونو وړاندې کوونکو شرکتونو لپاره په افغانستان کې دیادې محدودې طبیعي سرچینې څخه د اغیزمنې ګټې اخیستنې او دمخابراتي خدمتونو د لوړ کیفیت وړاندې کولو لپاره د مناسب چاپیریال رامنځته کول دي، چې په همدې موخه په دریو بانډونو (۱۸۰۰ ، ۲۱۰۰ ، ۲۶۰۰ میګاهرتز) کې مزایده ترسره شوه، د مخابراتي خدمتونو وړاندې کوونکي د پرمختللي عریض بانډ او موبایل ټکنالوجۍ څلورم نسل (۴ جی) معیاري خدمتونو وړاندې کولو لپاره د فریکونسي د غو بانډونو ته اړ تیا لري.
دیادولو وړده چې دا پروسه د مخابراتو او معلوماتي تکنالوجۍ وزارت د اترا اداري د فریکونسيو د تخصیص د پالیسۍ په رڼاکې، دمخابراتو او معلوماتي تکنالوجۍ وزارت د دیجیټلي حکومتولۍ متخصیصینو لخوا د جوړ شوي سیسټم پرمټ د افغانستان د اسلامي امارت د کابینې لخوا د مخابراتو او معلوماتي تکنالوجۍ محترم وزیر الحاج مولوي نجیب الله حقاني په مشرۍ د ټاکل شوې بین الوزارتي کمیټې په حضور کې په شفافه توګه تر سره شوه.
د مخابراتو او معلوماتي تکنالوجۍ وزارت او اترا اداره په مزایده کې له ټولو د خیلو اړخونو څخه د مننې ترڅنګ ګټونکو شرکتونو ته د زړه له تله مبارکي وایي او په هیواد کې مخابراتي خدمتونو ته د سراسري لاسرسي او نورو پر مختللو او با کیفیته خدمتونو د رامنځته کولو په موخه د مخابراتو او معلوماتي تکنالوجۍ سکتور و دې او پرمختګ ته ژمن دي.