د مخابراتو او معلوماتي ټکنالوژۍ او عدلیې محترمو وزارتونو تر منځ د یو شمېر سیسټمونو د جوړولو هوکړه لیک لاسلیک شو
د مخابراتو او معلوماتي ټکنالوژۍ وزارت ډیجیټل حکومتولۍ عمومي ریاست له لوري د امارتي ادارو لپاره د سیسټمونو د جوړولو په دوام د عدلیې محترم وزارت لپاره د تقنیني اسنادو د معلوماتي دیوان د پراختیا او تطبیق سیسټم، هوکړه لیک د مخابراتو وزارت مالي او اداري مرستیال ښاغلي الحاج حافظ محمد امین جان عمري او د عدلیې وزارت مسلکي مرستیال ښاغلي شیخ الحدیث مولوی عبدالکریم حیدر تر منځ لاسلیک شو.
په دغې ناسته کې د مخابراتو او معلوماتي ټکنالوژۍ وزارت مالي او اداري مرستیال ښاغلي الحاج حافظ محمد امین جان عمري د ډیجیټل حکومتولۍ په تطبیق او په اساس یې د چارو پر چټکتیا خبرې وکړې.
ښاغلي حافظ الحاج محمد امین جان عمري ټینګار وکړ چې د سیسټمونو په تطبیق سره به معلومات خوندي او چارې آسانه شي، وخت به سپما او د اضافه مصارفو مخنیوی به هم وشي.
د عدلیې وزارت مسلکي مرستیال خوښي څرګنده کړه چې اوس مهال افغانستان کې د دې فرصتونه رامنځته شوي څو د داخلي کادرونو په توسط د عصري ټکنالوژۍ په استفادې، مهم او د وخت د اړتیا مطابق او موافق سیسټمونه جوړ او امارتي ادارات او وزارتونه ترې ګټه واخلي.
د دغې سیسټم موخه د یوې مرکزي نقطې څخه د تقنیني اسنادو ثبت مدیریت، تنظیم او شفافیت دی چې له مخې به یې اسناد مصون او د اړونده کسانو لاسرسی به ورته اسانه او چټک شي همدا رنګه له تطبیق سره به یې د تقنیني اسنادو پلټنه، مطالعه او تر لاسه کولو آسانتیاوې هم رامنځته شي.
د مخابراتو او معلوماتي ټکنالوژۍ وزارت د ریاست الوزراء عالي مقام په هدایت د هېواد ټولو امارتي ادارو او وزارتونو لپاره د چارو د آسانتیاو په موخه اړین سیسټمونه جوړ او تطبیقوي چې تر دې دمه ګڼو امارتي ادارو او وزارتونو لپاره ډېر شمېر سیسټمونه جوړ شوي او د ګڼو سیسټمونو پر پراختیا کار روان دی.
