پکتیکا ولایت د مخابراتو او معلوماتي ټکنالوجۍ ریاست له لوري د یاد ولایت په مرکز او یو شمیر ولسوالیو کې د نویوسیمکارټونو د خرڅلاو له بهیر څارنه ترسره شوه
د پکتیکا ولایت د مخابراتو او معلوماتي ټکنالوجۍ ریاست له لوري په مرکز ښرنې او یو شمیر ولسوالیو کې د افغان بیسیم او اتصالاتو مخابراتي شرکتونو د نویو بې شمېرې او شمېرې لرونکو سیمکارتونو د خرڅلاو له بهیر څخه څارنه ترسره شوه.
د دغې څارنې په ترڅ کې ډاډ تر لاسه شو چې تر دې دمه د یادو مخابراتي شرکتونو له لوري په یاد ولایت کې د مخابراتو او معلوماتي ټکنالوجۍ وزارت د اټرا ادارې د کړنلارې مطابق د نویو سیمکارټونو د خرڅلاو لړۍ پر مخ روانه ده او همدا رنګه د ولایتي ریاست له لوري مخابراتي شرکتونو ته په دې برخه کې د مخابراتي شبکو مشترکینو لپاره د آسانتیاو د ډېرولو او سهولتونو د برابرولو سپارښتنې وشوې.
د مخابراتو او معلوماتي ټکنالوجۍ وزارت نظارتي ټیمونه د هېواد په ټولو ولایتونو کې د مخابراتي شرکتونو له خدماتو څخه وخت په وخت څار ترسره کوي او د غیر قانوني کړنو په صورت کې یې مخنیوی کوي.
