د مخابراتو او معلوماتي ټکنالوژۍ سرپرست وزیر محمد فهیم هاشمي، نن چهارشنبه د ام ټې ان مخابراتي شبکې له اجراییه رییس سره د لیدنې پر مهال له دې شرکت څخه غوښتنه وکړه، چې د مخابراتي مالیې محصولاتو په برخه کې د روڼتیا په پار دي ژر تر ژره له رییل ټایم سیسټم سره وصل شي. ښاغلي هاشمي همدا راز ټینګار وکړ، د دغه شرکت مسوولین باید د مخابراتي او انټرنیټي خدمتونو د لا ښه والې په پار کار وکړي، څو هیوادوال وکولای شي د دغې شبکې له لوړ کیفیت خدمتونو څخه برخمن شي. په ورته وخت کې، د ام ټې ان مخابراتي شرکت اجرایه رییس له رییل ټایم سیسټم سره د تړل کېدو په برخه کې بشپړ چمتووالی وښود او ډاډ یې ورکړ، چې د دغې شبکې مخابراتي خدمتونو د لا ښه والې په موخه تازه پراختیايي پروګرامونه تر لاس لاندې لري.