د مهاتما ګاندي د کلیزي مراسمو کې، د مخابراتو او معلوماتي ټکنالوژۍ سرپرست وزیر ګډون

د مخابراتو او معلوماتي ټکنالوژۍ سرپرست وزیرمحمد فهیم هاشمي، نن چهارشنبه د تلې میاشتې لسمه نېټه، د هند نوموتي مشر «مهاتما ګاندي» د پیدایښت یو سل او پنځوسمې کلیزې په مناسبت مراسمو کې، چې په افغانستان کې د دغه هیواد سفارت خوا جوړ شوي وه ګډون وکړ.
په افغانستان کې د هند سفیر، په دغه مراسمو کې د ښاغلي هاشمي له ګډون نه د مننې تر څنګ وویل، چې د افغانستان او هند اړیکې مخ په پراخېدو دي، مونږ له افغانستان سره هر اړخیزې همکارۍ ته ژمن یو.
په دغه مراسمو کې ښاغلي هاشمي وویل، «مونږ په داسې حال کې د مهاما ګاندي کلیزه لمانځو، چې نوموړی لا هم د بې عدالیتو او توپیري چلند پر وړاندې د سختې مبارزې الګو او سرلاری یادیږي.
 

نوموړي وویل، مونږ خوشحاله یو چې له هند سره نه شلېدونکې ملګرتیا لرو او له زړه یو بل ته درناوی لرو، مونږ لا هم د ټکنالوژۍ او ای ټي پرمختګ په برخو کې د هند ملاتړ ته هیله من یو، تر څو افغانستان هم پر یوه ډیجیټلي هیواد بدل کړو.
ښاغلي هاشمي، یو وار بیا د دواړو هیوادونو پر اغېزمنو همکاریو د ټینګار تر څنګ زیاته کړه، چې هند د افغانستان له پاره یو ښه ستراتيژیک ملګری دی او خوښ یو چې دغه هیواد مو تل، د یوه ښه ملاتړ په توګه تر څنګ ولاړ دی.
په دغه غونډه کې، د مهاتما ګاندي د کلیزي په ویاړ یو پستي ټکټ هم پرانیستل شو