د معلوماتي ټکنالوجۍ، مخابراتو او ساینس وزارت د پالیسی او پروګرامونو مرستیال معرفی شو
ښاغلی احمد مسعود لطیف رای دیوې غونډي په ترڅ کې چې پرون شنبه د ۱۳۹۹ لمریز کال د زمري د میاشتې په ۴ مه نیټه د معلوماتي ټکنالوجې، مخابراتو او ساینس وزارت کې جوړه شوې وه په رسمي ډول معرفي شو.
په غونده کې د یاد وزارت سرپرست ښاغلي محمد فهیم هاشمي، د لوړو زده کړو وزارت سرپرست او مرستیال، د ولسي جرګې د مواصلاتو او مخابراتو کمیسیون رئیس او یو شمیر غړیو او د مخابراتو وزارت د بیلا بیلو ریاستونو رئیسان ګډون درلود.
ښاغلي محمد فهیم هاشمي په خپلو خبرو کې ښاغلي لطیف رای ته د نوي دندې په مناسبت د مبارکۍ ویلو تر څنګ وویل: چې د ښاغلي رای مقرریدل د معلوماتي ټکنالوجې، مخابراتو او ساینس وزارت د نخبه سالارۍ پروګرام یوه برخه ده.
ښاغلي هاشمي د جلالتمآب جمهور رئیس څخه د مننې او قدردانۍ ترڅنګ هیله وښودله چې د ښاغلي لطیف رای په راتلو سره د وزارت په چارو کې به لازم بدلون او پرمختګ راشي.
ښاغلي هاشمي د وزارت موخو ته په اشارې سره وویل: معلوماتي ټکنالوجې نن ورځ زمونږ د ټولنې له لومړیتوبونو څخه دی. په مختلفو ابعادو کې د دغه سکټور پراختیا د وګړو د ژوند په هره برخه مستقیمه اغیزه لري. نوموړي زیاته کړه: چې د معلوماتي ټکنالوجۍ د پراختیا پرته، شفافیت، د بیروکراسۍ له منځه وړل او یا کمول او د فساد سره مبارزه ناشونۍ دی.
همداراز د لوړو زده کړو وزارت سرپرست ښاغلي عبدالتواب بالا کرزی په خپلو خبرو کې د مخابراتو وزارت کړنو او لاسته راوړنو ستاینه وکړه او وویل چې د معلوماتی ټکنالوجۍ وده او سمسورتیا زمونږ د ټولنې د بریاوو ضامن دی. ښاغلي بالاکرزی په لوړو زده کړو وزارت کې د ښاغلي لطیف رای کارنامې او کړنې مهمې وبللې.
ښاغلي لطیف رای پخپله لنډه وینا کې یادونه وکړه چې په ټول قوت د مخابراتو وزارت د پرمختګ او سمسورتیا لپاره کار کوي.
ښاغلي لطیف رای د جمهوري ریاست عالي مقام د ۷۵۹ د حکم پر بنسټ د دغه پست لپاره معرفي شوی دی.
