د مخابراتو وزارت غوره ښځينه کارکوونکې او د ICT سکټور لس غوره مېرمنې وستایل شوې

Alireza Khaliqyar
چهارشنبه ۱۳۹۷/۱۲/۱۵ - ۱۵:۲۰

https://mcit.gov.af/ps/%D8%AF-%D9%85%D8%AE%D8%A7%D8%A8%D8%B1%D8%A7%D8%AA%D9%88-%D9%88%D8%B2%D8%A7%D8%B1%D8%AA-%D8%BA%D9%88%D8%B1%D9%87-%DA%9A%DA%81%D9%8A%D9%86%D9%87-%DA%A9%D8%A7%D8%B1%DA%A9%D9%88%D9%88%D9%86%DA%A9%DB%90-%D8%A7%D9%88-%D8%AF-ict-%D8%B3%DA%A9%D9%BC%D9%88%D8%B1-%D9%84%D8%B3-%D8%BA%D9%88%D8%B1%D9%87-%D9%85%DB%90%D8%B1%D9%85%D9%86%DB%90-%D9%88%D8%B3%D8%AA%D8%A7%DB%8C%D9%84-%D8%B4%D9%88%DB%90

د مخابراتو او معلوماتي ټکنالوجۍ وزارت مشرتابه د ښځو نړيواله ورځ، د مخابراتو او معلوماتي ټکنالوجۍ وزارت د ښځينه کارکوونکو او د مخابراتو او معلوماتي ټکنالوجۍ سکټور کې د فعالو مېرمنو په حضور کې ونمانځله.

د مخابراتو او معلوماتي ټکنالوجۍ وزیر محترم شهزاد آريوبي ددغه غونډې په ترڅ کې وویل چې مېرمنو د مخابراتو او معلوماتي ټکنالوجۍ سکټور کې د نارينه و تر څنګ خپل اساسي رول ادا کړی او دا زموږ مسؤوليت دی چې په دې سکټور کې د مېرمنو ونډه زیاته کړو، کاري فرصتونه ورته برابر کړو او په دې سکټور کې يې له وړتياو ګټه پورته کړو.

د ښاغلي آريوبي په خبره د مخابراتو وزارت په دې برخه کې پراخه پروګرامونه په پام کې لري او په نږدې راتلونکي کې به د کار زده کړې پروګرامونه جوړ کړي چې پنځوس سلنه به يې مېرمنو ته ځانګړي شوي وي.

د مخابراتو وزیر همدا شان زیاته کړه چې ددې تر څنګ يې د ديجيټل کاسا پروژه کې د ICT سکټور د مېرمنو د ظرفيت لوړونې لپاره یوه ځانګړې برخه په پام کې نېولې.

د پروګرام په پای کې محترم شهزاد آريوبي د مخابراتو او معلوماتي ټکنالوجۍ وزارت ښځينه کارکوونکو ته ستاينلیکونه ورکړل او تر څنګ مو د مخابراتو او معلوماتي ټکنالوجۍ سکټور لس تنه غوره مېرمنو ته افتخاري اوارډونه اهداء کړل.