د مخابراتو او معلوماتي ټکنالوجۍ وزارت اټرا ریاست او د افغان ټلیکام مخابراتي شرکت تر منځ د نویو مخابراتي سایټونو د جوړولو په موخه د ۲۷ اعشاریه ۵ میلیونه افغانیو په ارزښت قرارداد لاسلیک شو
افغانستان کې د مخابراتي خدمتونو د تنظیم ادارې د لسمې پروژې چې ټولټال ۴۵۰ مخابراتي سایټونه پکې د هېواد لرو پرتو سیمو لپاره ځانګړي شوي له جملې یې د ۲۷۹ مخابراتي سایټونو قرارداد د ۲۷ اعشاریه ۵ میلیونه افغانیو په ارزښت د افغان ټلیکام مخابراتي شرکت سره لاسلیک شو.
پیل کې د مخابراتو او معلوماتي ټکنالوجۍ وزارت وزیر محترم الحاج مولوي نجیب الله حقاني د غونډې ګډونوالو ته ښه راغلاست وویل او د مخابراتو او معلوماتي ټکنالوجۍ وزارت د سکټور په اړه یې مفصل معلومات وړاندې کړل او دا یې جوته کړه چې یاد وزارت توانېدلی تېرو دوه کلونو کې د هېواد ګڼو سیمو ته مخابراتي اسانتیاوې ورسوي او هېوادوالو ته په دې برخه کې ګڼې آسانتیاوې رامنځته کړي.
ښاغلي وزیر صاحب زیاته کړه چې تېرو کلونو کې د مخابراتي خدمتونو د تنظیم ادارې له لوري ۹ پروژې سر ته رسېدلي چې په ټولو پروژو کې څه باندې ۸ سوه سایټونه نصب شوي خو د افغانستان اسلامي امارت له حاکمیت راوروسته یاد وزارت یوازې په لسمه پروژه کې ۴۵۰ مخابراتي سایټونه په نظر کې نیولي چې د ۲۷۹ سایټونو قرارداد یې نن لاسلیک او عملي چارې به یې پیل شي.
ورته مهال د افغانستان اسلامي امارت د جلالتمآب رییس الوزراء ملا محمد حسن اخند پیغام چې اوسني عصر کې د ټکنالوجۍ او مخابراتو په ارزښت راڅرخېده د غونډې ګډونوالو ته قراءت شو، یاد پیغام کې جلالتمآب رییس الوزراء د مخابراتو او معلوماتي ټکنالوجۍ وزارت یاد اقدام ستایلی او زیاته کړې یې ده چې اوسني عصر کې له ټکنالوجۍ په سالم ډول استفاده د ولسونو د پرمختګ سبب کېدلی شي.
وروسته د افغانستان اسلامي امارت د ریاست الوزراء اداري مرستیال ښاغلي عبدالسلام حنفي د خپلې وینا په ترڅ کې وویل چې د یادې پروژې له پلي کېدو سره نه یوازې دا چې د افغانستان لرې پرتې سیمې له مخابراتي او انټرنټي آسانتیاو برخمنې کېږي بلکې ډېری افغانان هم ورسره په کارونو بوختېږي، همدا راز نوموړي زیاته کړه چې یاد سایټونه د مخابراتو او معلوماتي ټکنالوجۍ وزارت د اټرا محترم ریاست له هغې بودیجې څخه جوړېږي چې د مخابراتي شبکو څخه په کمه فیصدۍ ګرځول کېږي.
په همدې موخه جوړه شوې غونډه چې د هېواد لوړپوړو چارواکو پکې ګډون کړی و یاد قرارداد یې افغانستان لپاره ګټور او د مخابراتو او معلوماتي ټکنالوجۍ وزارت کړنې یې د مخابراتي پوښښ په پراختیا او همدا راز د ټکنالوجۍ د ودې په برخو کې وستایلې.
یاد قرارداد د افغانستان د ارګ چهارچنار ماڼۍ کې د افغانستان اسلامي امارت د ریاست لوزراء اداري مرستیال ښاغلي عبدالسلام حنفي د مخابراتو او معلوماتي ټکنالوجۍ وزارت وزیر محترم الحاج مولوي نجیب الله حقاني، د حج او اوقافو وزارت وزیر محترم شیخ نورمحمد ثاقب د کورنیو چارو وزارت اداري مرستیال مولوي صاحب نورجلال جلالي، د اټرا محترم ریاست رییس ښاغلي الحاج مولوي برات شاه اغا ندیم، د افغان ټلیکام مخابراتي شرکت رییس انجنیر علي احمد سامند او د ګڼو ادارو چارواکو په مخ کې د یوې ځانګړې برنامې په ترڅ کې لاسلیک شو.
د یادونې وړ ده د یادې پروژې په عملي کېدوه سره به د هېواد ۱۸ ولایتونو ۳۲۰ ولسوالیو ته مخابراتي چوپړتیاوې چمتو کېږي او یاد سایټونه د هېواد هغو سیمو کې نصب کېږي چې له مخابراتي او انټرنټي آسانتیاو کلونه را پدېخوا محروم پاتې شوي وو