د غزني ولایت والي د مخابراتو او معلوماتي ټکنالوجۍ وزیر سره لیدنه ؤکړه
د غزني ولایت والي الحاج حافظ محمد امین عمري د مخابراتو او معلوماتي ټکنالوجۍ وزیر محترم الحاج مولوی نجیب الله حقاني سره د یاد ولایت مخابراتي ستونزې شریکې او د یاد ولایت په هغو سیمو کې چې تر دې دمه تر مخابراتي پوښښ لاندې نه دي راغلي د خدمتونو د رسونې غوښتنه ؤکړه.
د مخابراتو او معلوماتي ټکنالوجۍ وزیر محترم الحاج مولوي نجیب الله حقاني د لیدنې پر مهال وویل، دوی هڅه کوي د هېواد ټولو محرومو سیمو ته مخابراتي چوپړتیاوې ورسوي او همدا راز یې د غزني محترم والي صاحب ته ډاډ ورکړ چې لنډو ورځو کې به د افغان بیسیم مخابراتي شرکت یو سایټ د یاد ولایت زنخانو سیمه کې نصب او ګټې اخیستنې ته وسپارل شي او همدا راز په پام کې ده چې نیږدې راتلونکي کې به اجرستان، ناور، ګیرو، آب بند، رشیدان او د وردکو ولایت جغتو ولسوالۍ ته هم مخابراتي آسانتیاوې ورسېږي.
د مخابراتو او معلوماتي ټکنالوجۍ وزارت تل هڅه کؤي د هېواد ټولې برخې او په خاص ډول محرومې سیمې تر مخابراتي پوښښ لاندې راولي چې د همدې سلسلې په دوام یاد وزارت دوه خصوصي مخابراتي شرکتونو سره د ۳۶۵ میلیونو افغانیو په ارزښت تړون لاسلیک کړی چې د ۹ میاشتو په جریان کې به د هېواد ګڼې محرومې سیمې د ۳۳ مخابراتي سایټونو په نصبولو سره تر پوښښ لاندې راؤلي.
