افغان بیسیم مخابراتي شرکت ته د 3G جواز ورکړل شو
په هغه مطبوعاتي کنفرانس کې چې د ۱۳۹۲ کال د حوت میاشتې په ۲۸ مه نیټه د مخابراتو او معلوماتي ټکنالوجۍ وزارت د کنفرانسونو په تالار کې جوړ شوی وو افغان بیسیم مخابراتي شرکت ته د 3G ټکنالوجۍ جواز ورکړل شو.
د مخابراتو او معلوماتي ټکنالوجۍ وزیر ښاغلي امیرزی سنګین چې په یاد کنفرانس کې ګډون کړی و افغان بیسیم مخابراتي شرکت ته د نوي نسل 3G د صادریدو له امله خوښي څرګنده کړه او ویې ویل: د خوښۍ ځای دی چې د مخابراتو او معلوماتي ټکنالوجۍ وزارت په هیواد کې د نوي ټکنالوجۍ د لا ودې او پراختیا په لور یو بل ګام اخلي هغه همدا راز د مخابراتو او معلوماتي ټکنالوجۍ رول باارزښته وباله او ویې ویل: معلوماتي ټکنالوجۍ د ژوند په اقتصادي – ټولنیزو، فرهنګې، ښه حکومتولۍ او نورو برخو کې بنسټیز رول لوبوي .
ښاغلي امیرزی سنګین زیاته کړه چې زمونږ موخه د نوي او عصري ټکنالوجۍ په واردولو سره هیواد والو ته د مخابراتو او ټکنالوجۍ په برخه کې د لا ډیرو اسانتیاوو برابرول دي. تر اوسمهاله په هیواد کې د مبایل خدمتونه د پام وړ وده کړی او تقریبا د هیواد ټول وګړي ترې ګټه اخلي.
هغه وویل: د انټرنټ خدمتونو وړاندې کولو په برخه کې هڅې شوي چې تر اوسمهاله په ۲۰ ولایتونو کې د 3G خدمتونه فعالې شوي او زمونږهدف دا دی چې تر راتلونکي یوه کال پورې به ۸۰ سلنه هیواد وال انټرنټي خدمتونو ته لاسرسۍ پیدا کړي.
ښاغلي سنګین وویل: چې د 3G د جواز د صادریدو په لړ کې د مخابراتو او معلوماتي ټکنالوجۍ وزارت لخوا څه موده مخکې د 3G وروستۍ جواز د قانوني مراحلو په بشپړیدو سره سلام مخابراتي شبکې ته ورکړل شو او په ټولیزه توګه تر اوسمهاله ۴ مخابراتي کمپنیو هر یو ( اتصالات، MTN ، روشن او سلام) ته د 3G د فعالیت جوازونه ورکړل شوي دي.
ښاغلي امیرزی سنګین وویل: چې د مخابراتو په چارو کې د وزیرانو شورا کمیټې د مخکیني پریکړې سره سم اوس افغان بیسیم مخابراتي شرکت دې ته حاضر شوی دی چې د دریم نسل نوې ټکنالوجۍ (3G) جواز د ۲۵ ملیونو ډالرو پر وړاندې تر لاسه کړي.
د مخابراتو او معلوماتي ټکنالوجۍ وزارت هیله لري چې افغان بیسیم مخابراتي شرکت ته د 3G جواز په صادریدو سره به په مخابراتي مارکیټ کې سیالي نوره هم چټکه شي او هیوادوالو ته به با کیفیته او په مناسب قیمت خدمتونه برابر شي.
