د مخابراتو او معلوماتي ټکنالوجۍ وزارت د تېرې یوې اوونۍ په لړ کې د ترسره شویو کړنو او راپورونو لنډیز
د مخابراتو او معلوماتي ټکنالوجۍ وزارت تېرې یوې اوونۍ کې د مخابراتو په برخه کې د هېواد ګڼو سیمو کې د نویو مخابراتي سایټونو د جوړېدو له کاري بهیر څخه څارنه کړې، یو شمېر سیمو کې د غیرقانوني مخابراتي خدمتونو مخنیوی شوی او همدا راز د مخابراتو او معلوماتي ټکنالوجۍ وزارت وزیر ښاغلي الحاج مولوي نجیب الله حیات حقاني له مخابراتي شرکتونو سره د دوی د ستونزو د حل، مخابراتي خدمتونو د ښه والي او هېواد کې د سیمکارټونو د ثبت او راجسټر د پروسې په تړاو ناستې کړي.
د مخابراتو او معلوماتي ټکنالوجۍ وزارت توانېدلی تېرې یوې اوونۍ کې د هېواد ګڼو ولایتونو کې د مخابراتو او معلوماتي ټکنالوجۍ ولایتي ریاستونو ښوونیزو مرکزونو څخه ګڼ زده کوونکي فارغ او ټولنې ته یې د خدمت په موخه وړاندې کړي، د وزارت ولایتي ریاستونو د هېواد یو شمېر سیمو کې د غیر قانوني دستګاو د فعالیت مخنیوی کړی، د غیر مجاز مخابراتي سیمکارټونو او پوسټي مارکېټ د غیرقانوني پوسټي خدمتونو د مخنیوي په موخه یې څارنه ترسره کړې چې په نتیجه کې یو شمېر غیرقانوني دستګاوې او سیمکارټونه ضبط شوي او پوسټي مارکېټ کې د غیرقانوني شرکتونو مخه هم نیول شوې.
د یادونې وړ ده د مخابراتو او معلوماتي ټکنالوجۍ وزارت تېرې یوې اوونۍ کې د تدارکاتو سیسټم جوړ او ګټې اخیستنې ته سپارلی او همدا راز یې د احصایې او معلوماتو ملي ادارې سره د دوی د ولایتي څانګو په دفترونو کې د الکټرونیکي حاضرۍ د تطبیق په موخه هوکړه لیک هم لاسلیک کړی.
د مخابراتو او معلوماتي ټکنالوجۍ وزارت د تېرې یو اوونۍ لاسته راوړنې په مسلسل ډول خپرې کړي او دلته په خلص ډول نشر ته سپارل کېږي.
