خبري اعلامیه!
په دې وروستیو کې یو شمېر هېوادوال په ځانګړي توګه د سلام مخابراتي شبکې مشتریان، د اړیکو او انټرنیټي خدمتونو په وړاندې کولو کې د یو څه ستونزو په اړه، په پوهاوي یا نه پوهاوي سره په مجازي فضا کې د مخابراتو او معلوماتي ټکنالوجۍ وزارت په مشرتابه باندې نیوکې کوي، چې د مخابراتو او معلوماتي ټکنالوجۍ وزارت په دې اړه د هر ډول مسئولیت د نه منلو ترڅنګ، د ګرانو هیوادوالو د خبرتیا او پوهاوی لپاره لاندې ټکي شریکوي:
د افغان ټلیکام مخابراتي شرکت د ۱۳۹۹ د مرغومي میاشتې ۱۷ مې نیټې د ۴۱۵/۲۸۵ ګڼې متحدالمال مکتوب د دولتي شرکتونو د قانون (۶) مې فقرې د حکمونو او د افغانستان اسلامي جمهوري دولت د کابینې د مصوبې په استناد څرګنده کړې ده چې ټولې دولتي تصدۍ د ۱۳۹۹ د مرغومي میاشتې له لومړۍ نیټې څخه د دولتي شرکتونو په توګه پیژندل کیږي او مکلف دي چې په خپلو فعالیتونو کې د دولتي شرکتونو حکمونه، په پام کې ونیسي.
له همدې امله د افغان ټلیکام او سلام مخابراتي شرکتونه د پورتنۍ نیټې څخه وروسته د مخابراتو وزارت تر مدیریت لاندې فعالیت نه کوي.
د یادونې وړ بله موضوع دا ده، چې د مخابراتو او معلوماتي ټکنالوجۍ وزارت د مخابراتي سکتور د فعالیتونو د ښه والي لپاره یوازې او یوازې د پالیسۍ جوړونې دنده پر غاړه لري او د مخابراتي خدمتونو د تنظیم چارې د مخابراتو وزارت د صلاحیتونو او مسئلیتونو څخه نه دي.
پورتني ټکي په مخابراتي خدمتونو کې، چې د مخابراتي شرکتونو لخوا وړاندې کیږي ځینې ننګونې نه ردوي، بلکې د ګرانو هیوادوالو د خبرتیا او پوهاوي لپاره وړاندې شوي دي ترڅو خپل نظرونه او لیدلوري د غلط ادرس پر ځای د مسئولو او اصلي مراجعو سره شریک کړي.
په درنښت
د مخابراتو او معلوماتي ټکنالوجۍ وزارت
