د مشرانو جرګې د مواصلاتو او مخابراتو کمیسیون سره په ګډه غونډه کې د مخابراتي سکتور پر پیاوړتیا ټینګار وشو

دا ناسته د مخابراتو او معلوماتي ټکنالوجۍ وزارت سرپرست او د پالیسۍ او پروګرام مرستیال احمد مسعود لطیف رای په مشرۍ د مشرانو جرګې د مواصلاتو او مخابراتو کمیسیون د رییس او غړو، د وزارت د بیلابیلو ریاستونو رئیسانو او چارواکو په ګډون د مخابراتي سکتور خدمتونو د لا ښه والي او پیاوړتیا په موخه د وزارت د کنفرانسونو په تالار کې جوړه شوې وه.

په پیل کې د مشرانو جرګې د مواصلاتو او مخابراتو کمسیون رییس لطف الله بابا د دې سکتور د لاسته راوړنو او ننګونو په اړه په تفصیل سره خبرې وکړې او بیا د کمیسیون تخنیکي سلاکار د بریښنایي حکومتوالۍ، بریښنایي راکړې ورکړې او لاسلیک قانون، د پوستې خدمتونو تنظیم، کاسا ډیجیټل، سایبري امنیت، د مخابراتي شبکو خدمتونو د څارنې څرنګوالي، ریال ټایم او ټي ډي اف صندوق (TDF) د پالیسیو پلي کولو په اړه پوښتنې وکړې او په دې برخه کې یې د وزارت له مشرتابه څخه د وضاحت غوښتنه وکړه.

ورپسې د وزارت د پالیسۍ او پروګرام مرستیال احمد مسعود لطیف رای د دې کمیسیون پوښتنو او اندیښنو ته مشرح توضیحات وړاندې کړل او د دې وزارت مسولینو ته یې لارښوونه وکړه چې د کمیسیون پوښتنو ته په لیکلې بڼه ځوابونه وړاندې کړي.

په پای کې د مشرانو جرګې د مواصلاتو او مخابراتو کمیسیون رییس او غړو د مخابراتو وزارت د مشرتابه د مفصلو څرګندونو ستاینه وکړه او په دې برخو کې یې په همکارۍ، همغږي او پیاوړتیا ټینګار وکړ.