د دایکندي ولایت والي او ورسره مل پلاوي د معصومه خاوري سره ولیدل او د دغه ولایت د مخابراتي ستونزو د حل په اړه یې خبرې وکړې
![دیدار والی دایکندی با معصومه خاوری](/sites/default/files/2021-01/waly_w_hyyt_hmrah_hansh.jpeg)
د دایکندي ولایت والي ښاغلي احمد ضیا همدرد، د ولایت مرستیال او د سیمه ایزې ادارې یو شمیر رئیسانو، د ډیجیټل همغږی کوونکې ادارې رئیس، د ولایتي شورا غړو او د دې ولایت د علما و شورا رئیس ، د مرغومې میاشتې په ۲۳ نیټه د مخابراتو او معلوماتي ټکنالوجۍ له وزیرې آغلي معصومه خاوري سره ولیدل او د مخابراتو او انټرنیټ په برخو کې د ولایت د ننګونو او اړتیاو د حل لارو په اړه خبرې وکړې.
ښاغلي همدرد او د دایکندي د ډیجیټل همغږۍ کوونکي ادارې رئیس ښاغلي لطف الله شریعتي د دغه ولایت ننګونې په ګوته کړې او د مخابراتو او معلوماتي ټکنالوجۍ وزارت له رهبرۍ څخه یې د دایکندي ولایت په لرو پرتو ولسوالیو کې د مخابراتي خدمتونو پراختیا او د نوري فایبر په غزولو کې د همکاري غوښتنه وکړه.
همداراز د دایکندي ولایت د خلکو استازي په دغه ولایت کې د انټرنیټ سره د یو شمیر ښوونځیو د نښلولو د کار ګړندی کولو غوښتنه هم وکړه.
آغلې خاوري د ښاغلي همدرد او ورسره مل پلاوي د راتګ هرکلی وکړ او د مخابراتي خدمتونو او زیربناوو پراختیایې د ادارو ډیجیټل کولو لپاره یوه اړتیا وګڼله. نوموړې ژمنه وکړه چې د وزارت د دندو او امکاناتو په چوکاټ کې به د یادو ننګونو د حل لپاره هڅې وکړي.