GTR شرکت ته د پستي فعالیتونو جواز ورکړل شو:
دوشنبه ۱۳۹۸/۱۰/۲ - ۱۵:۳۵
نن دوشنبه د ۱۳۹۸ هجري کال مرغومې میاشتې دوهمه نېټه، د مخابراتو او معلوماتي ټکنالوژۍ وزارت اپرا ادارې یا پست ریاست او جي ټي ار شرکت تر مېنځ د پستي خدمتونو پراختیا او اغېزمنتیا تازه هوکړه لاسلیک شو.
د مخابراتو او معلوماتي ټکنالوژۍ وزارت مالي او اداري مرستیال ډاکټر محمد هادي هدایتي دغه ناسته کې وویل، خوښ یو چې د خصوصي سکټور د ملاتړ په برخه کې بل ستر ګام اوچتوو.
ښاغلي هدایتي زیاته کړه: « جي ټي آر، په افغانستان کې د پستي خدمتونو په برخه کې لسم شرکت دی، چې د پستي خدمتونو قانوني کولو او کاري اسانتیاوو رامېنځته کولو په برخه کې پام وړ پانګونه کوي.»
ښاغلي هدایتي زیاته کړه، د دغه تړون له مخې به د GTR شرکت (روان خدمت) څانګه په افغانستان کې پستي خدمتونو ته ځانګړې کوي او مونږ یې هر اړخیز ملاتړ ته تیار یو.
په غونډه کې د GTR شرکت رییس میرویس علیزي وویل: « خوښ یو چې په افغانستان کې د نورو برېښنايي خدمتونو تر څنګ بالاخره د ازادې سیالۍ له لارې، د پستي خدمتونو په برخه کې هم د خدمت زمینه تر لاسه کوو.»
د مخابراتو او معلوماتي ټکنالوژۍ وزارت پست ریاست، په بازار کې د پستي خدمتونو وړاندې کونکو تر مېنځ د سالم رقابت، معیاري نرخ لیکونو، په پستي خدمتونو کې د لوړ کیفیت، چټکتیا او خوندیتابه په موخه د خصوصي سکټور پانګونې ته تازه فرصتونه رامېنځته کړي دي.
.
