د مخابراتي او معلوماتي ټکنالوجۍ د څیړنې مرکز پرانیستل شو
پنجشنبه ۱۳۹۸/۴/۶ - ۱۳:۴۹
د روان 1398 کال د سرطان (چنګاښ) د میاشتې په 6 مه نیټه د مخابراتي او معلوماتي ټکنالوجۍ په انستیتیوت کې د معلوماتي ټکنالوجۍ څیړنیز مرکز د مخابراتو او معلوماتي ټکنالوجۍ سرپرست وزیر ښاغلي محمد فهیم هاشمی په حضور پرانیستل شو.
یاد لابراټوار چې د MTN مخابراتي کمپنۍ لخوا د 80 زرو ډالرو په پانګونه جوړ شوی دی په رسمي توګه د معلوماتي ټکنالوجۍ انسټیتیوټ ته وسپارل شو.
د مخابراتو او معلوماتي ټکنالوجۍ سرپرست وزیر ښاغلي محمد فهیم هاشمی په خپلو خبرو کې وویل : خوشحاله یم چې د مخابراتو او معلوماتي ټکنالوجې د ودې لپاره یو مهم او مثبت ګام پورته کوو، چې د محصلینو او بشري سرچینو د ودې لپاره ډیر اړین دی.
ښاغلی هاشمي وویل چې مخابراتي او معلوماتي ټکنالوجۍ د قتصاد د ودې، امنیت او بشري سرچینو د پراختیا لپاره خورا مهمه ده، او مونږ هڅه کوو چې مخابراتي او معلوماتي ټکنالوجۍ ته پراختیا ورکړو او د دغه سکتور د خدمتونو کیفیت ښه کړو او همدا راز مخابراتي شرکتونه هڅوو چۍ د لوړ کیفیت خدمتونه وړاندې کړي.
په افغانستان کې د MTN مخابراتي شرکت مشر ښاغلي محمد عباد رضا د یاد شرکت د فعالیتونو د یادونې ترڅنګ یې زیاته کړه چې د دوي شرکت د ځوانانو او محصلینو لپاره ښه او ګټور پلانونه لري ددې لابراتوار رامنځته کول د کمپنۍ د پلان یوه مهمه برخه ده.
همداراز په دې پروګرام کې د اطلاعاتو او فرهنګ وزارت د ځوانانو د چارو مرستیال ښاغلي محمد اجمل شاپور، د مخابراتي او معلوماتي ټکنالوجۍ انستیتیوت رئیس ښاغلي پرفیسور شفیع شریفی، د مخابراتي خدمتونو د تنظیم ادارې سلاکار ښاغلي محمد عطا یاری په وار سره د دغه لابراتوار پر اهمیت خبرې وکړې.
د پروګرام په پای کې د انستیتیوت او MTN شرکت ترمنځ د همکاری یو هوکړه لیک هم لاسلیک شو.
