جمهوررئیس غني د ملي هویت اسنادو د الکترونیکي کولو په اړه د مخابراتو او معلوماتي ټکنالوژۍ وزارت راپور واورېد
۳۰ - غبرګولې - ۱۳۹۷
جمهوررئیس غني د ملي هویت اسنادو د الکترونیکي کولو په اړه د مخابراتو او معلوماتي ټکنالوژۍ وزارت راپور واورېد
د افغانستان د اسلامي جمهوریت جمهوررئیس محمداشرف غني پرون ماښام د مخابراتو او معلوماتي ټکنالوژۍ وزارت او د (جي ټي آر) کمپنۍ له مسوولینو سره په کتنه کې د ملي هویت اسنادو د الکترونیکي جوړولو پر پروژې په اړه بحث وکړ.
په پیل کې د مخابراتو او معلوماتي ټنکالوژۍ وزیر شهزاد اریوبي د یادې پروژې د پرمختګونو او ننګونو په اړه وویل، د دغې پروژې زیاتره برخې بشپړې شوې او پاتې نورې برخې به یې تر راتلونکو شپږو میاشتو پورې بشپړې شي.
هغه د دغې پروژې په اړه خپل نظرونه او وړاندیزونه هم غونډه کې شریک کړل او وې ویل، په نېږدې راتلونکي کې به د برېښنایي تذکرو له ادارې سره هوکړه لیک هم لاسلیک کړي.
همداراز د ( جي ټي ار) کمپنۍ مسوول هم د دغې پروژې د قرارداد د مالي برخې په اړه جمهوررئیس او د غونډې ګډونوالو ته معلومات ورکړل.
وروسته د هېواد جمهوررئیس محمداشرف غني په خپلو خبرو کې یاده پروژه یوه ملي پروژه وبلله او وې ویل، برېښنایي حکومتوالي زمونږه اصلي موخه ده او یاده پروژه باید ژر ترژره په بشپړه توګه پای ته ورسېږي.
د هېواد جمهوررئیس لارښوونه وکړه چې د زیربناو په چارو کې د جمهوري ریاست د ستر سلاکار ډاکتر محمد همایون قیومي په مشرۍ او د مالیې، مخابراتو وزارتونو او برېښنایي تذکرې د ادارې په غړیتوب دې کمیټه جوړه شي چې د دغې پروژې بېلابېلې برخې په دقیقه توګه وارزوي. هغه وویل، له څېړنو وروسته دې د مخابراتو او معلوماتي ټکنالوژۍ وزارت په روښانه توګه خپل راپور او طرحه جمهوري ریاست ته وړاندې کړي.
