د اترا ادارې د 4G په هکله د افغانستان د اتصالاتو د مخابراتی شرکت خبری ګزارش رد کړ
د افغانستان د مخابراتی خدمتونو د تنظیم ادارې د ۳/۱۱/۱۳۹۱ نیټې د مطبوعاتی کنفرانس په ترڅ کې د افغانستان د اتصالاتو د مخابراتی شرکت هغه خبری ګزارش چې تر اوسه یی د دا ډول خدمتونو د وړاندی کولو، امتحان او یا د اړونده منابعو څخه د ګټې اخیستنې هیڅ ډول مجوز د نوموړې ادارې څخه نه دی تر لاسه کړی رد او هغه یې د نوموړې شرکت لخوا یو غولوونکی او د مقرراتی او رقابتی اصولو خلاف عمل وباله.
د آترا ادارې له نوموړې شرکت څخه په کلکه وغوښتل چې ژر تر ژره نوموړې خبر اصلاح او په راتلونکې کې له هرډول داسې عمل څخه ډډه وکړي چې د مخابراتی خدمتونو د مستهلکینو پر سلوک او په مارکیټ کې د سالم رقابت مقرراتی اصولو ته زیان رسولای شي. په نوموړې مطبوعاتی ناسته کې د مخابراتو او معلوماتی تکنالجی وزارت او اترا ادارې مسولینو او د ګڼ شمېر رسنیو استازو برخه لرله.
د ژورنالیستانو پوښنتو ته په ځواب کې د آترا اداري مسولینو یو ځل بیا ټینګار وکړ چې د خدمتونو د جوازلرونکې ټول شرکتونه باید د نوموړو خدمتونو د پوښښ ، د ګټې اخیستونکو د حمابت او د باکیفیته انترنیټي خدمتونود وړاندې کولو په هکله خپل ټول مکلفیتونه په جدي توګه تر سره کړئ.
