کندز ولایت مرکز کې د اتصالاتو مخابراتي شرکت د پنځو مخابراتي سایټونو انټرنېټي خدمتونو ظرفیت لوړ شو
د مخابراتو او معلوماتي ټکنالوجۍ وزارت د لارښوونې پر اساس، د کندز ولایت د مخابراتو او معلوماتي ټکنالوجۍ ریاست او د اتصالاتو مخابراتي شرکت په ګډو هڅو د یاد ولایت د مرکز اړوند (سید آباد کوڅه، د رادیو تلویزیون سړک، سپین زر سرک، کندز پوهنتون او نوآباد خواجه مشهد) سیمو کې د پنځو مخابراتي سایټونو ظرفیت له ۳جي څخه ۴جي ته لوړ او ګټې اخیستنې ته وسپارل شول.
د نوموړي مخابراتي شرکت د ۴جي انټرنېټي خدمتونو په فعالیدو سره اوسمهال د کندز ولایت د مرکزي سیمو اوسېدونکي کولای شي لوړ کیفیت او چټک انټرنېټي خدمتونو ته لاسرسی ولري او خپلې مخابراتي او انټرنېټي ستونزې هوارې کړي.
د یادونې وړ ده چې د کندز ولایت د مرکزي سیمو اوسېدونکو د مخابراتو او معلوماتي ټکنالوجۍ وزارت د دغه نیک اقدام ستاینه وکړه او د نوموړي ولایت د مخابراتو او معلوماتي ټکنالوجۍ ریاست، له هڅو یې خوښي څرګنده کړه.
