په افغانستان کې الکترد معلوماتي ټکنالوجۍ له لارې روغتيايي خدمات پېلېږي

د افغانستان د مخابراتو او معلوماتي ټکنالوجۍ وزارت په پلان کې لري چې د عامې روغتيا وزارت سره په همغږۍ په هېواد کې الکترونيکي روغتيايي خدمات وړاندې کړي. 
ددغه هدف د تر لاسه کولو لپاره د مخابراتو وزارت محترم وزیر ښاغلي شهزاد اريوبي د خپلو لیدنو په ترڅ کې نن د "On Point Cyber" کمپنۍ اجرائيوي رئیس سره په خپل کاري دفتر کې ولیدل او په هېواد کې د روغتيا سکټور کې د معلوماتي ټکنالوجۍ پر پراختيا (Telemedicine)، د معلوماتو خونديتوب(Cyber Security) او همدا شان د انټرنیټ د بنډویټ د مدیريت په موخه د یو ځانګړي سيسټم په رامنځته کولو خبرې وکړې. 
د ياد شرکت مسؤولينو ژمنه وکړه چې د مخابراتو او معلوماتي ټکنالوجۍ وزارت سره به د الکترونيکي روغتيايي خدماتو د وړاندې کولو په برخه کې همکاري وکړي او د دغه موخې تر لاسه کولو لپاره د ځانګړو سيسټمونو په جوړولو کې به پوره ونډه واخلي.
د مخابراتو او معلوماتي ټکنالوجۍ وزارت په پام کې لري چې سږ کال په ازمايښتي بڼه د کابل جمهوريت روغتون، د پکتيا روغتون او د سمنګان روغتون د Telemedicine له لارې سره وصل کړي.