په افغانستان کې، د ISPs شرکتونو له استازو سره د محمد فهیم هاشمي لیدنه
یکشنبه ۱۳۹۸/۱۲/۴ - ۱۵:۳۱
یکشنبه، د روان کال کب میاشتې څلورمه نېټه د مخابراتو او معلوماتي ټکنالوژۍ سرپرست وزیر محمد فهیم هاشمي، په افغانستان کې د انټرنیټ خدمتونو وړاندې کونکو شرکتونو له استازو سره وکتل.
په دغه لیدنه کې دواړو لوریو، د افغان ټلیکام شرکت له خوا د انټرنیټ عمده بییو راکمولو سربېره پر فایبر اسانتیاو، د ټلویزیون غره پر امنیتي ناخوالو، فریکونسۍ او تدارکاتي ستونزو خبرې اترې وکړې.
په دغه ناسته کې، محمد فهیم هاشمي استازو ته د ښه راغلاست تر څنګ زیاته کړه: «انټرنیټي اسانتیاوې د ډیجیټلي ټولنې اساسي اړتیا حسابیږي، په دغه برخه کې د لا زیاتو لاسته راوړنو په موخه باید د حکومت د تازه پالیسۍ له مخې (وایکو سیسټم) رامېنځته شي.»
نوموړي زیاته کړه: «زمونږ یوازینۍ موخه د خصوصي سکټور ملاتړ او ودې ته کار کول دي، ځکه خو د افغان ټلیکام شرکت له خوا عمده انټرنیټ له کوم توپیري چلند پرته وېشل کیږي»
د دغې لیدنې په پای کې، په افغانستان کې د انټرنیټ خدمتونو وړاندې کونکو شرکتونو استازو له مخابراتو وزارت سره د هر اړخیز ملاتړ ژمنه وکړه.
