ننګرهار ولایت کې د غیرقانوني پوستي خدماتو د مخنیوي په موخه څارنه تر سره شوه
د مخابراتو اومعلوماتي ټکنالوجۍ وزارت دهدایت په اساس د ننګرهار ولايت په جلال آباد ښار کې د مخابراتو رياست او ګډ کميسیون له لوري د پوستي خدمتونو څخه څارنه اوکنټرول ترسره شو.
د دې څارنې په ترڅ کې د یاد ولایت یو شمېر هغه شرکتونه چې د اپرا جواز یې نه درلودل او خدمات یې وړاندې کول فعالیتونه یې متوقف او دفاتر یې لاک او مهر شؤل او همدا راز د کارګو ځینو شرکتونو چې د پوسټي خدمتونو په برخه کې یې فعالیت کاوه سپارښتنه او تعهد ترې واخیستل شو تر څو غیر قانوني پوستي خدمتونه ترسره نه کړي.
دیادولو وړ ده چې د پوست قانون مطابق پوستي شرکتونه کولاى شي چې د يو مشتري پارسل د يو ګرام څخه تر ۴۲ کيلو ګرام پورې واخلي او خدمتونه ترسره کړي .
او همدارنګه د کارګو شرکتونه د يو مشتري پارسل چې د ۴۲کيلو ګرام څخه زيات وزن ولري واخلي اوخدمات ترسره کړي خو دکارګو شرکتونو مسئولين نشي کولاى چې د ۴۲ کيلو ګرام څخه کم وزن لرونکي پارسلونه د مشتري څخه واخلي.
دا څارنه دپوستي خدمتونو د غیر قانونی پوستی فعالیتونو د مخنیوي، د کارګو شرکتونو د کاري تفکيک په اړه د پوهاوي, او همدارنګه د دولتي عوایدو د ډیریدو په خاطر ترسره شوه.
