مخابراتو وزارت د ټرانسپورټي خدمتونو د سازده سازۍ سیسټم جوړوي؛ دوشنبه ۱۳۹۷ د غبرګولي ۱۴مه
نن دوشنبه د مخابراتو او معلوماتي ټکنالوجۍ وزارت، د آسان خدمت ادارې او د ټرانسپورټ وزارت تر منځ د ټرانسپورټي خدمتونو د پروسو د ساده سازۍ او د ټرانسپورټ وزارت د کارکوونکو د روزنې او ظرفیت لوړونې په اړه یو هوکړه لیک لاسلیک شو. دغه هوکړه لیک چې د آسان خدمت د رئیس ښاغلي محمد نعیم څمکني او د ټرانسپورټ د عمومي رئیس ښاغلي ویس سلطاني له لوري لاسلیک شو، د ټرانسپورټي خدمتونو په روڼوالي، چټکتیا او د ټرانسپورټي عوایدو په لوړولو کې به بنسټیز رول ولوبوي.
اوس مهال په افغانستان کې د ټرانسپورټي خدمتونو نظام ډېر پېچلۍ او له بېلابېلو ستونزو څخه برخمن دی، چې د معیاري خدمتونو د نه وړاندې کولو تر څنګ یې اداري فساد ته هم لاره هواره کړې ده. د دغه هوکړه لیک له مخې به د ټرانسپورټ وزارت د ټرانسپورټي شرکتونو د جوازونو او د بار وړونکیو او سوارلۍ وړونکیو موټرو د (خط سیر) کتابچې خدمتونه آسانه شي او له دې لارې به د ټرانسپورټي عوایو کچه څو برابره لوړه کړای شي.
