له مخابراتو وزارت څخه ۸۰ ښځینه محصلینو خپل ستاینلیکونه تر لاسه کړل!
د ډیجیټلي مهارتونو د پراختیا ریاست:
د مخابراتو او معلوماتي ټکنالوژۍ وزارت له خوا، د بېلابېلو پوهنتونونو ۸۰ ښځینه محصلینو ته په ورځنیو چارو کې له ټکنالوژۍ څخه د اغېزمنې ګټې اخیستنې په موخه پیل شوی پروګرام په بریالیتوب سره پای ته ورسېده.
دغه ښوونیز پروګرام، چې د Networking, Data, women in cyber او Practical sessions په برخو کې د مخابراتو وزارت په ودانۍ کې په لاره اچول شوی وو، د یو لړ ځانګړو مراسمو په ترڅ کې فارغو شویو محصلینو ته د ستاینلیکونو په ویشلو سره پای ته ورسېده.
په دغه مراسمو کې د مخابراتو او معلوماتي ټکنالوژۍ وزارت د دفتر رییس احسان الله احمدزي، له ښوونیز پروګرام څخه فارغو شویو محصلینو ته د مبارکۍ تر څنګ زیاته کړه: هیله من یو، دغه ښوونیز پروګرام مو د ژوند په چارو کې لا زیاتو بریاوو ته لاره هواره کړي.
وروسته د دغې برخې مسوولې اغلې زهرا نظري، د مخابراتو وزارت له مشرتابه څخه د دا ډول ښوونیزو پروګرامونو په پام کې نیولو له امله د مننې تر څنګ، د راتلونکو ښوونیزو دورو په اړه خپل پلانونه شریک کړل.