د ZTE شرکت مسؤلینو د اغلې معصومه خاوري سره د دوه اړخیزو همکاریو په خاطر لیدنه او خبرې وکړې
د ZTE شرکت مسؤلینو د مخابراتو او معلوماتي ټکنالوجۍ سرپرستې او نوماندې وزیرې اغلې معصومه خاوري سره د پیژندګلوی لیدنه وکړه. په دغه کتنه کې د یاد شرکت مسؤلینو آغلې خاوري ته د نوې دندې په مناسبت د مبارکۍ ویلو تر څنګ، د مخابراتي او انټرنیټي خدمتونو د بهبود لپاره د دوه اړخیزو همکاریو په پراختیا خبرې وکړې.
د ZTE چیني شرکت د هغو همکارو شرکتونو څخه یو دی، چې د څو کالونو په لړ کې د افغان ټلیکام مخابراتي شرکت سره په تخنیکي او مخابراتي برخو کې مرسته کړیده.
په دې لیدنه کې د نوموړي شرکت مسؤلینو خپلو پخوانیو همکاریو ته په اشارې، د افغان ټلیکام مخابراتي شرکت سره د 4 G خدمتونو په برخه کې د خپلو مرستو او همکاريو په پار لیوالتیا څرګنده کړه. اغلي معصومه خاوري د ZTE مخابراتي شرکت له همکاریو څخه مننه او خوښي څرګنده کړه او دوی ته یې د دولت په چوکاټ کې د هر راز همکارۍ ډاډ ورکړو.
نوموړې یادونه وکړه چې د کرونا ناروغیو را وروسته په دې بحراني حالت کې د مخابراتو او معلوماتي ټکنالوجۍ وزارت مشرتابه د 4G انټرنټي باکیفیته او چټکو خدمتونو په وړاندې کولو ژمنه ده.
په پای کې توافق وشو چې د دوه اړخیزو همکاریو لپاره به دواړه خواوې نورې ناستې او لیدنې هم ترسره کړي ترڅو یاد کارونه په منظم او ښه ډول سره په مخ لاړ شي.