د ۱۰% مخابراتي مالیې اړوند ولسي جرګې ته توضیحات ورکړل شو
د مخابراتو او معلوماتي ټیکنالوجۍ سرپرست وزیر ښاغلي شهزاد اریوبي د ولسي جرګې د مخابراتو او مواصلاتو کمیسون غړو ته د ۱۰% مالیې اړوند توضیحات ورکړل.
سرپرست وزیر د کمیسون د غړو پوښتنې او نظرونه واورېدل او بیا یې په دې اړه د خپل کار په موده کې د کړیو اقداماتو او د ۱۰% مالیې اړوند د RTDMS سستم په اړه له پرمختګونو خبر ورکړ. ښاغلي اریوبي وویل چې د ۱۰% مالیې د نظارت او حساب لپاره د الیکترونیکي سستم جوړول یې په خپلو کاري لومړیتوبونو کې دي. هغه زیاته کړه چې تر دې دمه ۸.۸۸ ملیارده افغانۍ له دغه مالیې څخه را ټولې شوي او په ځانګړي اکاونټ کې موجودې دي او هیڅوک ورته لاسرسی نلري، بلکې مستقیما د افغانستان د کلنیو عوایدو برخه ګرځي.
