د ښځو نړیواله ورځ د سایبري امنیت په برخه کې د ښځو ځواکمنولو په موخه د مخابراتو په وزارت کې ولمانځل شوه
![معصومه خاوری وزیر مخابرات و تکنالوژی معلوماتی](/sites/default/files/2021-03/mcit1.jpg)
دا برنامه د مخابراتو او معلوماتي ټکنالوجۍ وزیرې معصومه خاوري، د وزارت یو شمیر رئیسانو او ښځینه کارمندانو په ګډون کې ترسره شو.
د مخابراتو او معلوماتي ټکنالوجۍ وزیرې د مارچ اتمه، د ښځو نړیوالې ورځې په مناسبت په هیواد کې ټولو میرمنو په ځانګړي توګه د دې وزارت ښځینه کارمندانو ته مبارکي وویله او زیاته یې کړه چې نن ورځ په مختلفو څانګو کې د ښځو شتون د دوی د زړورتیا او هڅو پایله ده.
اغلې خاوري د مخابراتو او معلوماتي ټکنالوجۍ په سکتور کې د ښځو له فعال حضور څخه خوښي څرګنده کړه، خو ټینګار یې وکړ چې میرمنې کولی شي د تخنیکي پوهې په ترلاسه کولو سره پدې سکتور کې خپل حضور پیاوړی کړي، او د ټکنالوجۍ په کارولو سره محرومیت او نابرابرۍ له منځه یوسي.
پدې برنامه کې، د سایبري امنیت په برخه کې د ښځو ځواکمنتیا لپاره د پوهاوي ورکشاپ د معلوماتو سیسټمونو امنیت ریاست لخوا هم په لاره واچول شو.
د معلوماتو سیسټمونو امنیت رئیس ښاغلي محمد حسیني وویل چې د پروګرام اصلي هدف د سایبري امنیت په برخه کې د میرمنو پوهاوي، د بیلابیلو ګواښونو، خطرونو او سایبري جرمونو سره بلدتیا ترلاسه کول او همدارنګه د معلوماتو خوندي کولو په میتودونو پوهیدل دي.
ښاغلي حسیني وویل چې د پوهاوي دغه پروګرام به د ادارو اړتیاوو سره سم په راتلونکي کې پراخه شي او د نورو ادارو کارمندانو لپاره به هم پلي شي.