د مواصلاتو او مخابراتو کميسيون له خوا د مخابراتو وزارت د مشرتابه ستاینه وشوه
یکشنبه ۱۳۹۷/۱۰/۹ - ۱۲:۳۶
نن د ولسي جرګې د مواصلاتو او مخابراتو کميسيون د مخابراتو او معلوماتي ټکنالوجۍ وزارت د ورستيو لاسته راوړنو ستاينه وکړه.
د ولسي جرګې د مواصلاتو او مخابراتو کميسيون رئیس محترم قیس حسن په هغه جلسه کې چې په همدې موخه جوړه شوې وه زیاته کړه چې ستاسو د رهبرۍ لاندې د مخابراتو او معلوماتي ټکنالوجۍ وزارت د پام وړ لاسته راوړنې لري او ياد کميسيون په تېرو اته کلونو کې د لومړي ځل لپاره د مخابراتو او معلوماتي ټکنالوجۍ وزارت د مشرتابه څخه د هغوی د فعالیتونو له کبله د ستاينلیک په ورکولو قدردانی کوي.
د کمېسيون غړو هم په خپل وار زموږ د وروستيو لاسته راوړنو او فعالیتونو ستاينه وکړه.
د مخابراتو او معلوماتي ټکنالوجۍ وزیر محترم شهزاد آريوبي، د مخابراتي او معلوماتي خدماتو د پراختيا او ستونزو ته د رسيدګۍ په خاطر د مواصلاتو او مخابراتو کميسيون د همکارۍ څخه د مننې تر څنګ وویل چې په نوي ۹۸ مالی کال کې بېلابېل پروګرامونه په پام کې لرو چې خلکو مو د غوره مخابراتي او معلوماتي خدماتو څخه برخمن شي او ددغه سکټور پر وړاندې پراته خنډونه تر یو حده له منځه لرې شي.
همدا شان محترم آريوبي د کمېسيون غړو سره د مخابراتو او معلوماتي ټکنالوجۍ وزارت د راتلونکو پروګرامونو او سلام مخابراتي شبکې د پراختيا په اړه هم لازم معلومات شريک کړل.
