د معلوماتي ټکنالوجۍ، مخابراتو او ساینس وزارت سرپرست د پکتیکا او هلمند والیانو سره وکتل
د معلوماتي تکنالوجۍ، مخابراتو او ساینس وزارت سرپرست ښاغلي محمد فهیم هاشمي د هلمند ولایت والي تورن جنرال محمد یاسین او پکتیکا ولایت والي ښاغلي مجیب الرحمن څمکنی سره په جلا جلا توګه ولیدل او په دغو ولایتونو کې د مخابراتي او انټرنټي خدمتونو د کیفیت او شته ستونزو په اړه یې خبرې وکړې. په دې کتنه کې د سلام مخابراتي شرکت عملیاتی رئیس ښاغلي بشر نیازی هم حضور درلود. د مخابراتي خدمتونو وده، د شپې له خوا د ځینو سایټونو بندیدل، د سلام شرکت اړوندو سایټونو تجهیزاتو پراختیا او عصري کول د دی کتني له مهمو مسلو څخه وو. همداراز د هلمند او پکتیکا ولایتونو ښاغلو والیانو په خپلو سیمو کې د شته ننګونو او ستونزو د حل په خاطر خپلې غوښتنې د وزارت مشرتابه ته وړاندې کړې او په دغه برخه کې د اړوندو مخابراتي مسئولینو د پاملرنې غوښتنه کړه.
په پای کې د مخابراتو وزارت رهبري او اړوندو مسؤلینو، د مخابراتو وزارت او اترا ادارې ځانګړو او قانوني دندو ته په اشارې او تفکیک سره ژمنه وکړه چې ډیر ژر به په دغو ولایتونو کې د مخابراتي خدمتونو د ښه کولو او ستونزو د حل په خاطر لازم اقدامات ترسره شي.
