د مخابراتي شبکو محصولاتو ویشونکو اتحادیې د پرانیستې په مراسمو کې د آغلې خاوري ګډون او وینا
د مخابراتو او معلوماتي ټکنالوجۍ وزارت سرپرستې آغلې معصومه خاوري نن (سه شنبه، د تلي میاشتې په ۲۹ مه نیته) د مخابراتو شبکې ویشونکو اتحادیې د پرانستې په مراسمو کې ګډون او وینا وکړه. په دې غونډه کې د کابینې یو شمیر غړو، د ملي شورا غړو او د مخابراتي شرکتونو استازو هم برخه اخیستې وه.
د مخابراتو او معلوماتي ټکنالوجۍ وزیرې د دې اتحادیې د جوړېدو په مراسمو کې د مبارکۍ ویلو پرمهال په خپلو خبرو کې وویل چې د دې اتحادیې رامینځته کیدل زموږ او مخابراتي شرکتونو لپاره ښه زیرۍ دی. موږ تمه لرو چې د یوې داسې اتحادیې رامینځته کیدل به له یوې خوا په بازار کې ښه نظم او سالم رقابت رامینځته کړي او له بلې خوا به پانګونې راجلب کړي او د هیواد اقتصادي ودې لامل شي.
اغلې خاوري زیاته کړه چې له تیرو کلونو راهیسې د مخابراتو او معلوماتي ټکنالوجۍ وزارت یوه مهمه موخه په دې برخه کې د پانګونې راجلبول دي. دا پانګوونې، د ښو او باکیفیته خدمتونو وړاندې کولو سربیره، د دولت خزانې ته د پام وړ کلني عاید راوړي.
نوموړې یادونه وکړه چې یوازې د افغان ټلیکام مخابراتي شرکت د شاوخوا درې میلیونو ګډونوالو او د سلګونو ملیونو افغانیو پراخه پانګه اچونې سره د دولت خزانې ته په کال کې سلګونه میلیونه افغانۍ ورکوي.
د هغې په وینا د مخابراتي سایټونو نوي کول او عصري کول په مستقیم ډول د مخابراتو او انټرنیټي خدمتونو کیفیت پورې تړاو لري. د افغان ټلیکام مخابراتي شرکت په دې برخه کې ګامونه پورته کړي او موږ هیله لرو چې په هیواد کې نور مخابراتي شرکتونه هم په دې برخه کې له دې فرصت څخه په استفادې سره اقدام وکړي.
د اتحادیې مشرې آغلې پروین دراني وویل چې د اتحادیې جوړولو هدف د اقتصاد وده، د مخابراتو په بازار کې دندې رامینځته کول، د خصوصي سکتور څخه د حکومت ملاتړ راجلبول او د مخابراتي سکتورونو ترمنځ همغږي رامینځته کول دي.
همدا راز نوموړې په دغه پروګرام کې د میلمنو په ځانګړي توګه د مخابراتو وزیرې د حضور څخه مننه او قدرداني وکړه. دا اتحادیه په ټول هیواد کې د دریو مرستیالانو او څو غړو سره د قرارداديانو اتحادیه ده.
