د مخابراتو وزارت او افغان ټلیکام مخابراتي شرکت مشرتابه سره د معصومه خاوري لیدنه او پر ګډ کار ټینګار
د مخابراتو او معلوماتي ټکنالوجۍ سرپرستې وزیرې اغلې معصومه خاوري نن له غرمې مخکې او د هغې لومړۍ کاري ورځ کې د دغه وزارت د مشرتابه او د افغان ټلیکام مخابراتي شرکت د بیلابیلو څانګو له رئیسانو او چارواکو سره وکتل.
په پیل کې، د مخابراتو او معلوماتي ټکنالوجۍ وزارت سرپرسته د خپلو موخو او پلانونو په اړه په عمومي ډول خبرې وکړې او ویې ویل چې د وزارت اهدافو ته د رسیدو لپاره، موږ باید په ګډه او د یو ټیم په توګه کار وکړو.
اغلې خاوري زیاته کړه چې "سستي او غفلت" به د هغې په مدیریت کې هیڅ ځای ونلري او د وزارت ټولې څانګې او کارکوونکي به د دندې مسؤلیتونه د قانون په چوکاټ کې او د دندو د قانون سره سم ترسره کوي. هغه د کارمندانو په اجرااتو کې د مکافاتو او مجازاتو پر اصولو هم ټینګار وکړ او زیاته یې کړه چې مکافات او مجازات به د هغې د مدیریت په چوکاټ او اصولو کې د یو اصل په توګه شتون ولري.
ورپسې، د بیلابیلو څانګو رییسانو او مسؤلینو د خپلو اهدافو، دندو او کاري پلانونو په اړه لنډې خبرې وکړې او د وزارت مشرتابه ته په اړه یې توضیحات ورکړل.
همداراز، د دې وزارت د پالیسۍ او پروګرام مرستیال ښاغلي احمد مسعود لطیف رای ژمنه وکړه چې ټول کارکوونکي به له کلکې ژمنې سره له هر ډول شخصي انګیزو او اهدافو څخه لرې وي، د وزارت اهدافو ته د رسیدو لپاره به په ګډه کار وکړي او پروژې او برنامې به پلې کړي.
په پای کې، د وزارت ریاستونو ته لارښوونه وشوه چې خپل پلانونه او کاري راپورونه په راتلونکو ورځو کې د وزارت مشرتابه سره شریک کړي.
