د مخابراتو او معلوماتي ټکنالوجۍ وزیر د پارلمان د شکایتونو د کمیسیون غړو پوښتنو ته ځوابونه وویل
د مخابراتو او معلوماتي ټکنالوجۍ سرپرست او نوماند وزیر ښاغلي محمد فهیم هاشمي د یکشنبې په ورځ د پارلماني شکایتونو کمیسیون په غونډه کې ګډون وکړ او د کمیسیون غړو لخوا راپورته شوې پوښتنو ته یې ځوابونه وویل.
د کمیسیون غړو پوښتنو ته په ځواب کې د مخابراتو او معلوماتي ټکنالوجۍ وزیر ښاغلي محمد فهیم هاشمي وویل چې ډیری دغه اندیښنې او پوښتنې د آترا ادارې پورې اړه لري.
نوموړي وویل: چې د آترا اداره د درې کالو راهیسې د یوې خپلواکې ادارې په توګه د ټولو مخابراتي شبکو مسولیت په غاړه لري او د مخابراتو او معلوماتي ټکنالوجۍ وزارت په دغو برخو کې هیڅ مسؤلیت نلري.
د ټاکنو په ورځ د مخابراتي شبکو غیر فعاله کیدو په اړه ښاغلي محمد فهیم هاشمي وویل چې ده خپله له ټولو مخابراتي شبکو څخه څارنه کړې او اوسمهال ډیری دا ستونزې هوارې شوې دي.
هغه یادونه وکړه چې د مخابراتو او معلوماتي ټکنالوجۍ وزارت د ټاکنو نه یوه ورځ وړاندې د مخابراتي فعالیتونو ټولې ستونزې او اندیښنې او مسلې له افغان حکومت سره شریکې کړې دي.
ښاغلي هاشمي زیاته کړه: چې د مخابراتي شرکتونو د فعالیت څارنه د اترا ادارې په غاړه دی ، مګر د مخابراتو او معلوماتي ټکنالوجۍ وزارت په مهمو وختونو کې له دغې ادارې سره د ستونزو د مخنیوي لپاره همکاري کوي.
د سلام مخابراتي شبکې د فعالیتونو په اړه د مخابراتو او معلوماتي ټیکنالوژۍ وزیر وویل چې د سلام مخابراتي شبکه په خورا سختو شرایطو کې کار کوی او د طالبانو د څو ځله ګواښونو سره سره یې خپل فعالیتونو ته دوام ورکړی دی.
ښاغلي هاشمي وویل: موږ د سلام په شرکت کې خپل یو شمیر همکاران له لاسه ورکړل ، او موږ د ګواښونو سره سره خپلوخدمتونو او فعالیتونو ته دوام ورکوو.
د ولسي جرګې د شکایتونو کمیسیون رییس او غړو د ښاغلي هاشمي څخه په ناسته کې د ګډون له امله مننه وکړه او ځوابونه یې د استازو د قناعت وړ وبلل.
