د مخابراتو او معلوماتي ټکنالوجۍ وزارت په خوندي توګه د پُستي بستو د لیږد لپاره د ترانسپورت وزارت سره هوکړه لیک لاسلیک کړ
د روان 1396 کال د کب د میاشتې په 16 مه نیټه د مخابراتو او معلوماتي ټکنالوجۍ وزرات پر وخت او خوندي توګه د پُستي توکو د لیږد په موخه د ترانسپورت له وزارت سره هوکړه لیک لاسلیک کړ.
د دغه هوکړه لیک له مخې به ترانسپورټ وزارت د مخابراتو وزارت اړوند د افغان پُست ریاست ټولې پُستي بستې د معتبرو او راجستر شویو خصوصي ترانسپورټي شرکتونو له لوري له مرکز (کابل) او له ولایتونو پلازمېنې کابل ته انتقالوي. پدې سره به له يوې خوا د افغان پُست ریاست خدمتونه نور هم چټک او منظم شي او له بلې خوا به خلک وکولی شي په ډيرې اسانۍ او ژر خپل پُستي بستې ترلاسه کړي. همدارنګه ددغه هوکړه لیک په لاسلیک کیدو سره به د افغان پُست ریاست عواید لوړ شي، پُستي بستې به په خوندي توګه او په ټاکلي وخت رسیږي او ځوانانو ته به پکې د کار زمینه هم برابره شي.
