د مخابراتو او معلوماتي ټکنالوجۍ وزارت وزیر د هېواد شمال ختیځ ته د سفر په دوام تخار ولایت ته تللی او هلته یې د مخابراتي خدمتونو د ارزونې تر څنګ د ټي ډي ایف د لسمې پروژې له چارو له نیږدې لیدنه کړې
د مخابراتو او معلوماتي ټکنالوجۍ وزارت وزیر ښاغلي الحاج مولوي نجیب الله حیات حقاني د هېواد شمال ختیځ ته د سفر په لړ کې تخار ولایت ته تللی او هلته یې له ځايي مسؤولینو او د سیمې له اوسېدونکو سره د هغوی په ستونزو خبرې کړي او د حل په موخه یې ډاډ ورکړی.
ښاغلي وزیر صاحب تخار ولایت ته د سفر په ترڅ کې د یاد ولایت له والي ښاغلي مولوي صاحب سمیع الله حزب الله سره لیدنه کړې او دواړه لوریو د تخار ولایت بیلابیلو سیمو کې په مخابراتي چوپړ او آسانتیاو خبرې کړي دي، ښاغلي سمیع الله حزب الله د مخابراتو او معلوماتي ټکنالوجۍ وزارت له مشرتابه مننه کړې چې یاد ولایت ته یې سفر کړی اود مخابراتي خدمتونو په برخه کې له نیږدې ارزونه کوي، د ښاغلي والي صاحب مولوي سمیع الله حزب الله په وینا له تېرو څه باندو ۳ کلونو کې یاد ولایت ته د مخابراتي خدمتونو په برخه کې د پام وړ کار شوی او هیله یې څرګنده کړه چې هغه سیمې چې لا هم مخابراتي ستونزې لري د مخابراتي آسانتیاو په موخه ورته مخابراتي انټنونه په پام کې ونیول شي.
دغې لیدنه کې د مخابراتو او معلوماتي ټکنالوجۍ وزارت وزیر ښاغلي الحاج مولوي نجیب الله حیات حقاني د مخابراتي آسانتیاو د برابرولو په موخه او هغه سیمې چې لا هم له مخابراتي خدمتونو بې برخې دي اړونده برخو ته د ۶ مخابراتي سایټونو د جوړولو هدایت ورکړ چې د ۳ میاشتو په ترڅ کې به په عاجل ډول فعال او ګټې اخیستنې ته وسپارل شي.
د یادونې وړ ده د تخار ولایت هغه سیمو لپاره چې له مخابراتي خدمتونو بې برخې وې او هیڅ راز مخابراتي آسانتیاوې یې نه درلودې ۱۷ مخابراتي سایټونه د ټي ډي ایف له بودیجې هم منظور شوي دي چې د ډیری مخابراتي سایټونو چارې تر ډېره بریده مخې ته تللي.
په ټوله کې د تخار ولایت بیلایبلو سیمو کې د (۶) نویو مخابراتي سایټونو له منظورۍ وروسته ۲۳ مخابراتي سایټونه جوړېږي چې د یاد ولایت ډېری سیمې به له مخابراتي آسانتیاو برخمنې شي.
