د مخابراتو او معلوماتي ټکنالوجۍ وزارت وزیر د روشن او ام ټي ان مخابراتي شرکتونو مسؤلینو سره لیدنه وکړه
د مخابراتو او معلوماتي ټکنالوجۍ وزارت وزیر ښاغلي الحاج مولوي نجیب الله حیات حقاني د ام ټي ان مخابراتي شرکت رییس ښاغلي هشام رمضان او د روشن مخابراتي شرکت رییس ښاغلي وایچسکي پلوسکي سره افغانستان کې پر مخابراتي پوښښ، مخابراتي سکټور پر پراختیا، د سیمکارټونو د ثبت او راجسټر پر پروسې او په ټوله کې هېوادوالو ته د مخابراتي سکټور له لارې په معیاري ډول د خدماتو پر وړاندې کولو خبرې او لازمې لارښوونې وکړې.
د مخابراتو او معلوماتي ټکنالوجۍ وزارت وزیر ښاغلي الحاج مولوي نجیب الله حیات حقاني راغلیو پلاوو ته د ښه راغلاست تر څنګ افغانستان کې د مخابراتي سکټور پر پراختیا او معیاري خدماتو په وړاندې کولو ټینګار وکړ او همدا راز زیاته یې کړه چې اوس مهال ټولو مخابراتي شرکتونو ته د پانګونې او د خدماتو د پراختیا د پیاوړتیا لپاره زمینه مساعده ده او کولای شي د هېواد هر ګوډ کې خپل چوپړ وړاندې کړي.
ښاغلي وزیر صاحب مخابراتي سکټور ته ډاډ ورکړ چې د وزارت رهبري د مخابراتي سکټور د ودې او پرمختګ په برخه کې مخابراتي سکټور ته د اصولو او مقرراتو له مخې د پوره همکارۍ ډاډ ورکوي او مخابراتي شرکتونه هم مکلف دي چې خپلې ستونزې حل، کیفیت د ښه والي په برخه کې اقدام وکړي، هېوادوالو ته معیاري چوپړ وړاندې او د خدماتو کچه لرو سیمو ته وغځوي.
همدا راز د روشن او ام ټي ان مخابراتي شرکتونو مسؤلینو هم ډاډ څرګند کړ چې دوی هم د اوسني فرصت څخه په استفادې هڅه کوي نوې پانګونه وکړي او افغانستان کې خپلو مشترکینو ته معیاري خدمات او چوپړ وړاندې کړي.
د ښاغلي هشام رمضان او د وایچسکي پلوسکي په وینا مونږ افغانستان کې د معیاري خدمتونو د وړاندې کولو په موخه میلیونونه ډالر پانګونه کړې او د مخابراتو او معلوماتي ټکنالوجۍ وزارت څخه مننه کوو چې افغانستان کې یې په قانوني ډول مخابراتي خدمتونو ته لار پرانیسته، د طرزالعمل مطابق د سیمکارټونو ثبت او راجسټر پروسه تر ډېره بریده مخې ته تللی او کیفیت د ښه والي په موخه یې د فریکونسۍ مزایده ترسره کړه چې یادو مخابراتي شرکتونو پکې په پوره لېوالتیا برخه واخیسته او په تطبیق کېدو سره به یې هېواد کې مخابراتي کیفیت لوړ او ښه شي .
د یادونې وړ ده دغې ناسته کې د ام ټي ان مخابراتي شرکت د مقرراتي او دولتي چارو مسؤل ښاغلي عبدالمالک قاضي زاده او افغانستان کې د روشن مخابراتي شرکت مسؤل ښاغلي عزت الله هاشمي هم ګډون کړی و
