د مخابراتو او معلوماتي ټکنالوجۍ وزارت تخنیکي ټیمونو له لوري یو شمېر امارتي وزارتونو کې د ظرفیت لوړونې پروګرام پیل شو
د امارتي ادارو د معلوماتي ټکنالوجۍ اړوند برخو د تخنیکي ظرفیت لوړونې او غوره همغږۍ په موخه، د مخابراتو او معلوماتي ټکنالوجۍ وزارت د تخنیکي او مسلکي ټیمونو له لوري په بېلابېلو وزارتونو کې د ظرفیت لوړونې منظمه لړۍ پيل شوې، چې په ترڅ کې یې اړوندو کارکوونکو ته مسلکي پریزنټېشنونه، عملي لارښوونې او تخنیکي مشورې وړاندې کېږي.
دغه برنامه د مخابراتو او معلوماتي ټکنالوجۍ وزارت د معلوماتي ټکنالوجۍ ریاست او د ګڼو وزارتونو په ملتیا پیل شوې ده، چې د مخابراتو او معلوماتي ټکنالوجۍ وزارت تخنیکي ټیمونه پکې په اړوندو وزارتونو کې تخنیکي او مسلکي پریزنټېشنونه وړاندې کوي.
په دې برنامه کې د معلوماتي ټکنالوجۍ په برخه کې د پوهې زیاتوالی، سایبري امنیت، شبکه، ډیټاسنټر او د کلوډ له زیربنا سره بلدتیا شامل دي. همداراز، په امارتي ادارو کې د شبکې د څارنې او مدیریت سیستم جوړول، د کلوډ ټکنالوجۍ د کارولو اهمیت او ګټې، د شبکې خوندي ساتنه، د معلوماتو د بیک اپ اهمیت، او د تخنیکي زیربناوو د ښه مدیریت او د خدمتونو د خونديتوب په موخه د ډیټاسنټر او سرور خونې د عملیاتو او خدمتونو طرحه او تنظیم هم د دې برنامې مهم موضوعات رانغاړي، چې په تخنیکي او منظم ډول د اړوندو وزارتونو کارکوونکو ته وړاندې کېږي.
