د مخابراتو او معلوماتي ټکنالوجۍ وزارت او د احصایې ملي ادارې تر منځ په ملي ډیټا سنټر کې د سرورونو کولوکیشن, د تولد کارتونو د سیستم هاسټ کول او ګودام دارۍ سیسټم د جوړولو هوکړه لیکونه لاسلیک شول
د مخابراتو او معلوماتي ټکنالوجۍ وزارت وزیر ښاغلي الحاج مولوي حمدالله نعماني او د احصایې ملي ادارې مالي او اداري مرستیال ښاغلي مولوي عبدالسلام حقاني، احصایې ملي ادارې ته د مخابراتو وزارت په ملي ډیټا سنټر کې د سرورونو او نورو تخنیکي وسائیلو د کولوکیشن خدماتو د وړاندې کولو، د تولد کارتونو جوړولو سیسټم د هاسټ کولو او ګودام دارۍ لپاره د سیسټم پر جوړولو تفاهمنامې لاسلیک کړې.
د دغو هوکړه لیکونو له مخې به د مخابراتو او معلوماتي ټکنالوجۍ وزارت په ملي ډیټا سنټر کې د احصایې ملي ادارې اړوند ټولو سرورونو او نورو تخنیکي وسائیلو د کولوکیشن او تولد کارتونو لپاره د سیستم د هاسټ کولو خدمات وړاندې کېږي همدا اراز له مخې به یې د مخابراتو او معلوماتي ټکنالوجۍ وزارت احصایې ملي ادارې ته د ګودام دارۍ یو پرمختللی سیسټم جوړوي چې د توکو او جناسو د کټګوریو ثبت، د سریل نمبرونو تعینول، د توکو د ځانګړنو او ډولونوثبت، د ویشل شویو او پاتې توکو تعداد او ورته نورې مهمې ځانګړنې لري، چې په اساس به یې د ګدام دارۍ په برخه کې چارې اسانې او په منظم ډول مدیریت شي.
په دغه ناسته کې د مخابراتو او معلوماتي ټکنالوجۍ وزارت وزیر ښاغلي الحاج مولوي حمدالله نعماني ډاډ څرګند کړ چې د مخابراتو او معلوماتي ټکنالوجۍ وزارت د ډیجیټل حکومتولۍ د تطبیق او همدا راز د ټکنالوجۍ په برخه کې امارتي ادارو او وزارتونو ته د آسانتیاو د برابرولو په برخه کې ژمنتیا لري.
ورته مهال د احصایې ملي ادارې مالي او اداري مرستیال ښاغلي مولوي عبدالسلام حقاني هم د خپلو څرګندونو په ترڅ کې د مخابراتو او معلوماتي ټکنالوجۍ وزارت څخه مننه وکړه چې د یادو تفاهم لیکونو په اساس به د احصایې ملي ادارې تولدکارتونو لپاره غوره تخنیکي چاپیریال برابر او د ګودام دارۍ د چارو د آسانتیا په موخه یو منظم سیسټم جوړ شي چې دوی به وکولای شي خپلې چارې د مخابراتو او معلوماتي ټکنالوجۍ وزارت له لوري د برابرو شویو امکاناتو په اساس ښه خدمات وړاندې کړي.
د مخابراتو او معلوماتي ټکنالوجۍ وزارت چې هېواد کې د ډیجیټل حکومتولۍ د تطبیق او همداراز د ټکنالوجۍ په برخه کې د سیسټمونو د جوړولو، تطبیق او د ملي ډیټا سنټر له طریقه د خدماتو د وړاندې کولو دنده پر غاړه لري تر دې دمه توانېدلی امارتي ادارو او وزارتونو ته د چارو د آسانتیاو په موخه ګڼ شمېر مهم سیسټمونه جوړ او ګټې اخیستنې ته یې وسپاري.
