د مخابراتواو معلوماتي ټکنالوجۍ په برخه کې ۱۷۵ تنو ته د فراغت سندونه ورکړل شول
د مخابراتي او معلوماتي ټکنالوجۍ په برخه کې د رڼا پوهنتون ۱۷۵ تنو ته د فراغت سندونه د یوې غونډې په ترڅ کې د کابل ستار په هوټل کې د مخابراتو او معلوماتي ټکنالوجۍ وزیر ښاغلي امیرزی سنګین په ګدون جوړه شوې وه ورکړل شول.
په یاده غونډه چې په همدې اړوند د کابل ستار په هوټل کې جوړه شوې وه د مخابراتو او معلوماتي ټکنالوجۍ وزیر ښاغلي امیرزي سنګین، ددغه وزارت مرستیالانو او رهبري پلاوي، د پوهنتونونو رئیسانو او د رسنیو استازو په کې گډون کړی و.
په پیل کې د مخابراتو او معلوماتي ټکنالوجۍ وزیر ښاغلي امیرزي سنګین محصلینو ته د هغوی د فراغت په مناسبت مبارکي وویله او زیاته یې کړه ډیر خوښ یم چې یو ځل بیا د مخابراتي او معلوماتي ټکنالوجۍ په برخه کې د کادرونو او متخصصینو د فراغت په دې جشن کې ګډون کوم او د ویاړ او خوښۍ ځای دی چې بیا هم د هیواد ۱۷۵تنه د معلوماتي ټکنالوجۍ انجنیری په برخه کې د فراغت سندونه ترلاسه کوي.
ښاغلي سنګین زیاته کړه: چې د مخابراتو او معلوماتي ټکنالوجۍ له یوې خوا د نوي او مډرن تکنالوجۍ په واردولو هڅه کړې په ورته وخت کې د وړتیاو د لوړولو په برخه کې هم اړین اقدامات تر سره کړي دي.
هغه وویل: چې په همدې موخه د هیواد په ټولو ولایتونو کې د معلوماتي ټکنالوجۍ د زده کړې مرکزونه او همدارنګه د سیسکو اکاډمی یې جوړې کړي دي.
همدارنګه ښاغلي امیرزي سنګین زیاته کړه د تعلیمي سویې کیفیت ډیرمهم دی او مونږ ټول په ځانګړې توګه ځوانان په ګډه کوښښ وکړو ترڅو زمونږ ګران هیواد د لوړې علمي او مسلکي کچې څخه برخمن شي او زمونږ تاریخي هیواد د ګاونډیو هیوادونو په سر کې ځای ونیسي. نوموړي په آخر کي یو ځل بیا د نویو فارغ شویو کادرونو ته مبارکي وویله او د لا ښه خدمت هیله یی ورڅخه وکړه.
په پای کې یو تن فارغ شوي محصل د هیواد په تحصیلي چارو کې د مخابراتو او معلوماتي ټکنالوجۍ وزیر او د وزارت رهبری پلاوي د پاملرنې څخه د مننې په څرګندولو سره ژمنه وکړه چې هیواد ته د خدمت په لاره کې به د خپلې پوهې او توان په پوره توګه پکار واچوي.
