د غزني ولایت د مخابراتو او معلوماتي ټکنالوجۍ ریاست د کمپیوټر ښوونیز مرکز څخه ۶۲ تنه فارغ شول
د غزني ولايت مخابراتو او معلوماتي ټکنالوجۍ رياست له لوري د کمپيوټر او عصري علومو په برخه کې، له شپږ مياشتنيو زده کړو وروسته ۶۲ تنو زده کوونکو ته بري ليکونه وويشل شول.
په هغه غونډه کې چې همدې مناسبت جوړه شوې وه د غزني ولایت د مخابراتو او معلوماتي ټکنالوجۍ رئیس فارغ شویو ځوانانو ته د مبارکۍ ویلو ترڅنګ په اوسني عصر کې د معلوماتي ټکنالوجۍ په ارزښت اړتیا خبرې وکړې.
د غزني ولایت د مخابراتو ریاست د دوه دېرشمې دورې ښوونیز پروګرام څخه ټول ۶۲ تنه زده کوونکو ته چې په ډله کې یې ۲۶ تنه د ښونځیو زدکوونکي او ۳۶ تنه د کثیرالرشتوي انسټيټوټ محصلین شامل دي، د فراغت سندونه تر لاسه کړل.
د مخابراتو او معلوماتي ټکنالوجۍ وزارت د اوسني عصر اړتیا او د ټکنالوجۍ ارزښت ته په کتو د هېواد په ټولو ولایتونو کې د کمپیوټر د زده کړې علمي مرکزونه جوړ او د ټکنالوجۍ په پرمختللو وسایلو سمبال کړي چې د مجربو ښوونکو له لوري هېوادوالو ته پکې په علمي او عملي ډول تدریس کېږي.
